Nongpoh, Ïaïong 11:
Ki pulit ka Ri Bhoi District lyngba ka Anti-Narcotics Task Force (ANTF) ha ka Sngi Ba-ar hadien ka jingïoh jingtip ba tikna halor ka jingdon jong ki briew kiba thmu shalan ïa ki jingdih pynbuaid kiba la khang pyrshah na Silchar sha Guwahati, ki la pynlong ïa ka jingpynap shrip bad ïoh ban bat noh ïa kawei ka bos kaba don ïa u number AS24-C-9855 hajan Umling.
Hadien ka jingïoh bat ïa katei ka kali, ki pulit ki la pynlong ïa ka jingtalasi bad ïoh ban kurup kumba 7 tylli ki jingsong kiba la thep ïa u jingdih pynbuaid ‘Ganja’ uba khia kumba 8.6 kilo. Nalor u Ganja, ki pulit ki la ïoh ruh ban kurup ïa ar tylli ki mobile phone.
Halor kane ka bynta na ka liang ki pulit ki la kem noh ïa ar ngut ki briew kiba dei na Patna jong ka jylla Bihar kiba la tip kyrteng kum u Rohit Raj Pandey (22) bad u Bipul Kumar (19) katkum ki kyndon aiñ jong ka Narcotic Drugs and Psychotropic Substances (NDPS) bad ka jingtohkit halor kane ka jingjia ka dang ïaid shakhmat.
