Shillong, Ïaïong 11:
Ka dheng kali ha nongbah Shillong ka la nang shyrkhei na uwei u snem sha uwei pat namar ka jingbun ki kali, bad la sakhi ruh ïa ka jingpynkheiñ ïa ki kyndon ñiah kali ha India, kaba ki nongñiah ïa ki kali bad ar shaka ki dei ban bud ryntih, kata ban ñiah kali na sha ka liang kamon, ym na sha ka liang kadiang.
Ha nongbah Shillong, ka dheng kali ka dei kaba ki paidbah ki ngiah tam eh man la ka sngi, khamtam ha ki sngi ba long trei bad ba long skul.
Ki paidbah nongleit jingleit la ki dei kiba na nongbah Shillong ne kiba wan na kiwei pat ki district bad kiwei ki Jylla, la dep khuslai lypa haba ki la poi ha nongbah Shillong namar kin mad beit ïa ka dheng kali.
Ka por bajur bha ka dheng kali ha sor ka dei ha ka por ba wai skul namarba kiba bun na ki khun ba don ba em, la leit buh sha skul da ka kali lajong, bad ynda la wai skul ruh la don kiba wan shaw da ka kali ban leit sha la ïing.
Ki surok bah ne surok rit ha shnong ha thaw ki sah kumjuh ym lah shuh ban pynheh, hynrei ki kali pat ki mih man ka sngi la ki dei ki kali rim ne kali ba dang sei thymmai na jaka die kali.
Ki briew kiba wan na thaiñ nongkyndong kiba dei ban pyndep ïa la ki kam la ka dei ha ki shlem treikam Sorkar ne kiwei pat ki kam, ki la ïathuh ba ki mad jingeh bha haba ki wan sha Shillong namar ki shah tuh ïa ka por ha ka dheng kali, bad kim lah ban pyndep kam tang shisngi.
Ki nongkamai kali ruh ki ud namar la ktah ka kamai kajih haba la jur palat ka dheng kali.
Sa kawei pat ka jingeh kaba la nang bynrap shuh shuh ban dheng kali ha Shillong ka dei ka jingñiah kali kaba khlem bud kyndon ñiah kali.
Ka jingpynkheiñ ïa ki kyndon ñiah kali ka jur eh hapdeng ki nongñiah ar shaka kiba ïaid katba mon ha surok la ka dei na ka liang kadiang ne na ka liang kamon.
Kane ka la nang wanrah shuh shuh ïa ka dheng kali namar ki tur kat shaba lait jaka bad kane ka rukom niah ka buh jingma ruh ïa ki briew kiba ïaid harud surok namar kine ki ar shaka ki ïaid beit kim kheiñ na ka liang kadiang, ne kamon.
Ka kyndon ñiah kali ha India, ka dei borabor sha ka liang kamon, kaba mut ba ki kali ne ar shaka lada ki kwah ban tam (pass) ïa kiwei pat ki kali, ki nongñiah ki hap ban shim na sha ka liang kamon, ym na ka liang kadiang.
Wat ki pulit pynïaid kali ki la mad jingeh ban pynïaid haba la jur eh ka dheng kali, bad la sakhi ba ka aiñ kam leh ei ei ïa ki nongñiah ar shaka, kiba rung bad tynruh kat naba lait jaka da kaba pynkheiñ ïa ki kyndon ñiah kali tang ba kin poi kloi sha ka jaka kaba ki thmu ban leit.
Kiba bun ki paidbah kiba ïaid kjat la ka dei ha Khyndai Lad ne thaiñ IGP ki pynpaw ka jingdiaw namarba ki nongñiah ar shaka ki la buh jingma shisha ïa ka jingim kiwei pat namar ki rung na sha ka liang bym dei ban rung (wrong side) ha ryngkat ka jingpynher sted ïa ki ar shaka.
Kumta ki paidbah ki kyntu ïa ki briew ka aiñ kiba pynïaid kali ba kim lah ban shu peitkai ïa kiba pynkheiñ ïa ki kyndon ñiah kali jong ka ri India.
