Charleston, Iaïong:
Ka khlur ialehkai Tennis na ka ri Tunisia ka Ons Jabeur mynta ka sien ka lah rah ia ka thong jingjop na ka lympung ialehkai Charleston Open kaba dang shu kut shen. Kane ka wan urlong hadien ba katei ka nong-ialehkai ka lah ioh ban iakhun phainal biang sa shisien bad ka Belinda Bencic, tat haduh ba kan da lah ban rah ia ka thong jingjop shalade da 7-6 (6), 6-4 bad ka long ruh ka khusnam jingjop kaba lai ha ka jingim ialehkai ka jong ka.
Ka khubor ka iathuh ruh ba ka Ons Jabeur kaba bat ia ka kyrdan ba-ar ha katei ka lympung ialehkai, ka la lah ban pynliem noh ia katei ka nongiakhun pyrshah na Switzerland; kaba lah rah teng ia ka jingjop na ka lympung shi snem mynshuwa. Ha ka jingiakhun ka jong ki, ka Ons Jabeur ka lah pynkylla ia ka rukom ialehkai baroh kawei katba ka dang iai beh nadien da 5-3 ha ka set iakhun ba nyngkong, ka jingiakhun jong ka kaba kynthup ka jinglah ban pynphai ia ka bol bad ka jingpyllait im halade ia ki ar dor-thong set ialehkai na ka bynta ban jop ha ka tiebreak. Ha ka set iakhun kaba khatduh, ka Jabeur ka lah ioh ban pynkhein ia ki dor-thong sambol jong ka Bencic haduh lai sien. Hynrei ha ka por ba ka Bencic ka lah tied ia ka bol kaba lah wan pyrshah sha ka na ka jingsam bol ka jong ka, kata ka bol ka lah her Shabar jong u lain bad pynlong ia ka Ons Jabeur ban dap da ka jingkmen kaba khraw ha ka jingkhur syndon ka jong ka ia ka jingjop ba nyngkong ha ka jingshimbynta jong ka ha katei ka lympung ialehkai ha USA.
Ka khubor ka iathuh ruh ba ka jingshah rem noh jong ka Bencic ha ka tei ka jingiakhun ka pynkut ruh syndon ia ki 10 jingialehkai kiba ka lah khur ia ki jingjop ha ka jingiaid lynti jong ka ha ka kam ialehkai.
