Shillong, Ïaïong 11:
Ar ngut ki nongïalam jong ka Balang Presbyterian Laitumkhrah, kata u Pastor Reuben G Laloo bad u Tymmen Basan T Nongkhlaw la ong ba ki la shah pyndik ha ki runar katba ki dang don ha ka lyngkha trei ban leit ïakynduh ïa la ki missionary ha Bihar.
Katkum ka khubor ba la ïoh lum, la ong ba kine ar ngut ki la ngat ha kti jong ki paidbah kiba la bitar bad kham hadien la ïalam noh ïa ki sha thanat. Ïa kane ka jingjia la shimkhia mar-mar da ki bor sorkar ka Bihar hadien ka jingtuklar jong u Myntri Rangbah ka Jylla u Conrad K Sangma.
Haba ïoh ban ïakren bad u Rev. E.L Kharmawphlang uba dei u Pastor in-charge jong ka Balang ha Laitumkhrah, u la ïathuh ba katkum ka jingïoh ban ïakren bad u Pastor Reuben ha kane ka sngi, u la ainguh ïa U Blei ba ki la ïoh ban wan phai bad ban mih noh na Bihar.
Haba kylli, u Rev. Kharmawphlang u la ong ba kine ki ar ngut ki nongïalam ka Balang ki la leit sha Bihar ban ïakynduh ïa u paralok Pastor bad katkum ka jingtip, imat kane ka jingshah pyndik ka la dei ha ka por katba ki dang pynlong jingduwai hapoh ka ïing, ha kaba imat ki la don ki briew bym ithuh, kiba la sngewthuh bakla halor kane.
Shuh shuh u la ong ruh ba ka jingshimkhia mar mar jong ki briew na shathie bad kumjuh ruh ka sorkar Meghalaya, kitei ar ngut ki la ïoh ban wan phai suk na katei ka jylla.
Katba na ka liang ki bahaïing hasem jong kitei ar ngut ki la pyntip ba hadien ba ki la mih na Patna da ka liengsuiñ sha Kolkata, kin sa poi ha ka nongbah Shillong ha ka 12 tarik Ïaïong, 2023.
