New Delhi, Iaïong:
Na ka liang ka synjuk ba pyniaid ia ka jingialehkai Kriket hapoh India ka Board of Control for Cricket in India (BCCI) ka pynpaw mynta ia ka jingthmu ba ka don ha kaba iadei bad ka jingthaw thymmai pat sa shisien ia ki san tylli ki madan ialehkai. Ka jinglut ha kaba ia dei bad kane ka bynta la khein antad ba kan kot sha ka T. 500 klur kum ka jingpynkhreh ka ri na ka bynta ban pynlong ia ki jingialehkai jong ka lympung ODI World Cup ka ban sdang naduh u Risaw haduh u Naiwieng mynta u snem.
Katei ka lympung ialehkai, khlem pep ka la lah ban khung shibun ka song pisa ha ki 10 snem ba lah leit noh bad kaba lah pynlong ruh ia ka synjuk kaba riewspah tam ha ka pyrthei. Ha ka por ba pynlong ia ka jingialehkai Test hapdeng ka India-Australia ha u bnai Rymphang haduh u Lber, ki paidbah kiba lah wan ban sakhi ia ki jingialehkai ki pynpaw ia ka jingsngewkhia kaba jur halor ki jingdkoh jingduna kiba bun ha ki madan ialehkai bad ruh ka jingbym shym la don satia ka jingkhuid ha ki jaka leit-bar ha ka Arun Jaitley Stadium ha Delhi.
Kumjuh ruh kam shym la long kaba nyngkong ba ka Delhi ka long napdeng kiwei pat ki san tylli ki madan ialehkai kaba iehnoh ia ki kam pyntrei ki jong ka kaba ka lah ioh na ka synjuk na ka bynta ka jingpynbha nadong shadong ia ka madan. Shuh shuh ruh katkum ka thup kyrteng ba lah ioh lum ha kaba iadei bad kita ki san tylli ki madan ialehkai ba lah buh mynta ia ka thong da ka tei ka synjuk ki long ka madan ialehkai ha Hyderabad, Kolkata, Mohali bad Mumbai nalor katei ka madan ialehkai ha Delhi.
Kumba ka paw hi ka long ba ka Wankhede ha Mumbai ka lah dep ha ka ban pyntyllun ia ki kam ki jam jong ka na ka bynta ban pynthymmai ia ka madan baroh kawei ha shuwa ka lympung ialehkai ODIs hapdeng ka India-Australia ha u bnai ba dang shu dep hadien ba ki paidbah ki lah ujor halor ka jingbym shym biang satia ki jingdonkam ha ki jaka leit-bar ka jingbym shym la lah ban wanrah ia ka jingkhuid jingsuba ha katei ka madan ialehkai ba pawnam. Ha ka jingkhein antad na ka bynta ka jinglut ha ka ban pynthymmai mynta ia kitei ki san tylli ki madan ialehkai ka lah kot sha ki spah klur. Ka BCCI ka iathuh ruh ba kan poi haduh T. 100 klur na ka bynta ban pynthymmai pat ia ka madan ialehkai ha Delhi, T. 117.17 klur ia ka madan ha Hyderabad, T. 127.47 klur ia ka jingpynbha ia ka madan ialehkai ba pawnam bha ha ka ri kaba don ha Kolkata ka Eden Gardens, T. 79.46 klur na ka bynta ka madan kaba ha Mohali ka PCA bad T. 78.82 klur ka jingpynbha shuh shuh ia ka madan ha Wankhede bad ka jinglut jingsep ka lah ruh ban kiew lada donkam ban leh ruh ia ki tnum jong ki madan ialehkai katkum ka jingibit.
Katba ka jingpynkhreh jong ka BCCI na ka bynta katei ka lympung ka lah nang iai iaid shakhmat, ka khubor ka iathuh ruh ba 12 tylli ki madan ialehkai lah dep ban jied mynta hadien ba lah mait noh ia ki katto katne ki kyrteng ba lah tyrwa bad kita ki madan ba lah shah jied mynta ki kynthup ia ka madan ialehkai ha Bengaluru, Chennai, Delhi, Dharamsala, Guwahati, Hyderabad, Kolkata, Lucknow, Indore, Rajkot, Mumbai bad Ahmedabad. Kumta ruh, kumba haduh 48 tylli ki jingialehkai yn pynialehkai ha ki 46 sngi jong katei ka lympung ialehkai ka ICC.
Kum ban shu pynkynmaw ruh ba ka India khatduh eh ka lah ioh ban pynlong ia ka tei ka lympung iakhun World Cup ha u snem 2011; uba long u snem ha kaba u Mahendra Singh Dhoni kum u kapten ka kynhun u lah btin lynti shaduh ka lynti ban rah syndon ia ka trophy jingjop na ka lympung baroh kawei.
