Shillong, Ïaïong 11:
Ka Voice of the People Party (VPP) ka khot ka wer ïa baroh ban ïatylli lang kawei hapoh ka jingïalam ka seng haba ïadei bad ka mat jong ka bhah thung kam ne ka ‘Reservation Policy’.
“Ka VPP ka ai jingïaroh sha ki sengbhalang bapher-bapher bad ki ’riewshimet kiba la ai jingkyrshan ba sngur bad ba pura jong ki ïa ka jingïaleh ka seng ban pynsangeh shuwa ban pyntreikam ïa ka ‘Roster System’ kat bym pat dep pynkylla ïa ka jingbhah kam,” la ong u nongaiktien ka seng, Dr. Batskhem Myrboh ha ka kyrwoh khubor.
U la ong ruh ba ka seng ka kut jingmut ban nang pynkhlaiñ shuh ïa ka jingdawa bad ka jingïaleh ban wanrah ïa ka jingpynkylla ha ka rukom bhah kam na bynta ka jingbiang lang jong baroh ha ka Jylla.
“Ka long kaba donkam eh ban ngin long kiba ïatylli mlon baroh hapoh ka jingïalam ka VPP namar dei tang kane ka seng kaba buh ïa kane ka mat ha ka thup kular ilekshon jong ka,” u la ong.
U Dr. Myrboh u la ong ruh ba ka jingpyrshang jong ki katto-katne ban pynsaphret ïa ka sur u paidbah hadien ka ilekshon ha kaba ïadei bad kane ka kam kan wanrah pynban tang ka jingshah rem bad ka jinglehraiñ.
“Ka mynnor ka sakhi shai wat haba bun ki nongïalam sengbhalang kiba mih shakhmat ban dawa ïa ka jingpynkylla ïa kane ka rukom bhah kam kaba dkoh ha ba bun ki liang hynrei ki leh klet pat haba ki la long ki nongïalam ha ki seng bapher-bapher,” la ong biang une nongaiktien.
Kumta ka seng ka khot ka wer ïa iwei-pa-iwei ban ïasnoh kti lang bad ka VPP ha ka jingïaleh jong ka khnang ban poi sha ka thong jong ka jingjop.
Shuh shuh u la bynrap ba nalor ka jingïakren bad ka Sorkar, ka seng kan pynlong ruh ki jingïalang ha kylleng ka Jylla ban pynshai sha ki paidbah ïa ka jingdonkam ban pynsangeh shuwa ïa ka ‘Roster System’ bad ban pynkylla ïa ka rukom bhah kam.
