Jowai, Ïaïong 12:
Ka jingkyntur pud bad jingpynibor jong ka sorkar Assam ha ka jylla Meghalaya ka dang ïai bteng kat haduh kine ki sngi ba mynta. Ha kane ka kynti ka sorkar Assam ka la lur surok sha ki thaiñ Khatkasla Psiar kaba don ha West Jaiñtia Hills District.
Kane ka jingkyntur pud da ka sorkar Assam ka la pynlong ïa ki bor pynïaid District jong ka West Jaiñtia Hills ban shimkhia ïa kane ka kam shwa ban mih ki jingpyrshah bad jingkynthoh na kiba bun ba lang.
Ha ka jingleit jurip ïa kane ka jinglur surok da ka Assam ha ki thaiñ Khatkasla Psiar kaba la ïalam da u Bah Wankhraw Kupar Kharbuli, MCS Executive Magistrate, u Bah Barister Ñiang Block Development Officer (BDO) Laskeiñ, u AJ Sangma DSP ka West Jaiñtia Hills District ryngkat ka jingsynran lang ki pulit ki la shem ïa ki nongtrei surok bad ki kali JCB kiba dang trei ïa katei ka surok.
Katkum ka jingïathuh ki nongtrei, la ong ba ïa kane ka surok la pyntrei da ka sorkar Assam na ka shnong Umkhyrmi haduh Khatkhasla ha ka jingjrong kumba 10 kilometre lyngba ka skhim jong ka sorkar pdeng.
Ka jinglur ïa ka surok ka la poi haduh ha Riat Kyn-o bad Ïurim Biam kaba don ha ka khappud jong ka shnong Khatkasla bad Psiar. Kitei ki nongtrei ki la ïathuh ba ka jingpyntrei ïa kane ka surok mynta ka la ïaid kumba katto katne taïew.
U Bah Wankhraw Kupar Kharbuli u la bthah ïa ki nongtrei surok jong ka Assam ban lum ban lang bad pynkynriah ïa ki kali JCB bad Dumper jong ki. Ki nongtrei surok ruh ki la kohnguh ïa kane ka jingbthah da kaba sangeh ka jingpyntrei bad leit phai noh sha Assam.
Haba ïakren bad u Bah Wankhraw Kupar Kharbuli, u la ong ba ki la ïoh ka jingujor na u BDO ka Laskeiñ ba ka don ka jingpyntrei ïa ka surok kaba poi shaduh ka shnong Khatkhasla bad haba ïoh ïa ka jingtip na ka liang u District Magistrate ula bthah ban hiar jurip sha katei ka jaka ban lap ïa ka jingshisha.
U la ong ha ka jinghiar jurip la lap shisha ba ka don ka jingpyntrei ïa ka surok bad haba wad jingtip na ki nongtrei surok la lap ba uba pyntrei ïa kane ka surok ne u kontraktor u dei uba napoh ka jylla Meghalaya.
U la ïathuh ba na ka liang ka bor pynïaid District ka la ïakren bad u kontraktor bad ki la ïoh jingtip ba ïa kane ka surok la pyntrei lyngba ka skhim jong ka sorkar pdeng.
