C. B. Iawphniaw
Imat ka don ka daw kaba khanglad ia ka ktien Khasi ban ioh rung ha ka Eight Schedule ka Riti synshar ka ri India. Ka lah ban dei ka jingleh hi ki jongngi. Namar wat kita ki nongmihkhmat badonburom ne kita ki nongthaw ain ruh ki ong ba ka Jylla Meghalaya ka dei ka Jylla ba kren da ka ktien phareng. Ha ka jingshisha ka Ri Khasi – Jaintia bad Garo ka dei ka Jylla kaba kren da ka ktien Khasi bad ka Ktien Garo ha baroh ka Jylla, ym dei ba kren phareng. Lada phi leit sha ki thain nongkyndong ym don ba iohsngew ba ki briew kin kren da ka ktien nongwei. Dei tang ha ki College ki University ba ki hikai da ka Phareng. Hynrei ha ki iing ki sem, ha ki iew ki hat ha ki shnong ki thaw ki kren beit da ka ktien shnong (Local Dialect) la jan ha baroh ka Jylla. Kumno kein ngin ong ka Jylla ba kren da ka phareng. Lehse dei na kane ka daw bah kaba pynjyrwit jyrwat ia ka ktien khasi ban ioh rung ha ka khyrnit kaba phra ne ka Eight Schedule ka ri synsahr ka ri India, Kane ka long tang ka mat soh kyrdot kaba rit eh ha ka jingiohi jongnga kaba la dei bad ka ktien Khasi bad Garo kaba shim por ban ithuh na ki bor ba dei peit ia ki jait ktien hapoh ka ri.
