Moscow, Iaiong:
Naduh ba sdang jong ka thma Russia bad Ukraine ha u snem ba la leit, la ong ba ki la mih ki khubor halor ka jingbym biang ha ka koit ka khiah jong u President ka Russia u Vladimir Putin ha kine ki snem bad ki sngi ba mynta. Kumta ruh la ong ba katkum ka kaiphod ba la ioh na ki tnat ka koit ka khiah jong ka Russia, la shem ba utei u nongialam ka Russia, u la don ia katto katne ki jingshitom ha ka met jong u, kynthup naduh ki jingshitom ha ka khlieh, ka jingduna ka bor iohi bad kumjuh ruh ka jingbym ïohsngew jingmad shuh jong u thylliej. Namarkata la ong ba kitei ki 3 tylli ki jingshitom kiba la don ha ka met jong u, ki la wanrah jingeh ia ki doktor ka Russia ba kin sumar bad pynkhiah ia u ha kine ki sngi.
Katei ka khubor ha kane ka por, ka long hadien katto katne ki khubor ba la bna ba u Putin um don shuh ia ka met kaba shait ba khlaiñ.
Shuh shuh ruh la ioh jingtip ba u Putin u la don jingthud ruh wat ha ki bynta jong ka kti ka mon bad kumjuh ruh ka kjat ka mon jong u. Kumta ki doktor jong ka Russia ki la hap ban sumar shuwa ia kitei ki jingshitom kiba kham paw shabar, ha kaba u Putin ruh u la hap ban thiah ‘rest’ shwa da kumba katto katne sngi.
Watla katta, la ong ba utei u nongialam ka Russia, u la kyntait ban thiah ne shongthait shwa shi por kumba la bthah da ki nongsumar.
Ha kajuh ka por ruh la ong pat ba ka jinglong jingman ha ka met jong u, ka la kham biang ha kane ka por ba mynta.
Ha u Rymphang ba la leit, kawei ka video ba la pyni shaphang ka jingbym beit shuh ha ka rukom iaid bad rukom treikam ki kjat jong u Putin, ka la wanrah ia ka jingsngew khia na ka liang ki bahaiing- hasem bad ki nongbud jong u ha katei ka por, katba u dang leit ban kynduh ia u President ka Belarus u Alexander Lukashenko.
Katkum ki khubor na Spain lei, la ong ba u Putin u dang iakhun ia ka jingpang bampong bad kiwei de kiba ka met jong u ka la kynduh. Ia kane la sakhi ruh da uwei u nongbud jong u Putin ha ki por ba la leit.
