Shillong, Ïaïong 12:
U Voice of the People’s Party (VPP) kaba dei ka seng riewlum kaba dang shu ïoh shen ïa ka jingithuh kum ka State Party na ka ECI hadien ba ka lah ban leh bha ha kane ka ilekshon MLA kaba dang shu dep. Kane ka seng ka don ruh ïa ka jingthmu ban ïakhun ha ka ilekshon MP ha u snem ban wan da kaba pynïeng ïa u Dr Ricky AJ Syngkon kum u kyrtong.
U Dr Ricky AJ Syngkon u dei uba bat kam kum u General Secretary jong ka seng VPP bad ruh uba la shah rem noh ha ka ilekshon MLA kaba dang shu dep na Umsning Konstitwensi.
Lah ban pynkynmaw ba shwa ka ilekshon MLA mynta u snem haba ka VPP ka la pynbna ïa ka kyrteng u Dr Syngkon kum u kyrtong ka seng, bun ki bym tip ne ithuh. Hynrei hadien ba la pynbna ïa ka jingmih na ka ilekshon (result) ka la pynlyngngoh ïa ki babun balang namar ka jingïoh ïa ka vote kaba bun wat la u dang dei tang u briew ba thymmai.
Haba phai sha ka ilekshon MLA kaba dang shu dep, u Dr Ricky AJ Syngkon kyrtong ka VPP uba la ïakhun na Umsning u la wan ha ka kyrdan ba saw hadien ba u ïoh haduh 5456 vote.
Kumba ka paw mynta, ka la mih ka jingïakren bad don ruh katto katne kiba la kam ban ïakhun ïa ka ilekshon MP na ka seng VPP, kata hadien ba la sakhi ïa ka jingleh bha kane ka seng bad kiew ruh ha ka jingïoh vote ha kiba bun ki konstitwensi ba ka pynïeng kyrtong ha kane ka ilekshon MLA kaba dang shu dep.
Wat la ka ilekshon MP kan sa long ha u snem ban wan, hynrei haduh mynta na ka liang jong ka VPP kam pat shym la ïakren satia halor kane ka bynta ne ban pynbna ïa u kyrtong ka seng ban ïakhun ïa kane ka ilekshon, hynrei lah ban sakhi ba ki la don katto katne ki ’riew rangbah kiba la pynpaw ka jingangnud ban ïakhun na kane ka seng.
Hynrei katkum ki tyllong khubor ba la ïoh la sngewthuh ba kumba ka long hi, ka VPP ka la phaikhmat sha u Dr Ricky AJ Syngkon ban long kum u kyrtong ka seng ha kane ka ilekshon MP ban wan.
