Shillong, Ïaïong 12:
Na ka bynta ban nang pynkhlaiñ ïa ka seng National People’s Party (NPP) kaba dei ka seng kaba ïalam ïa ka sorkar Meghalaya Democratic Alliance (MDA)-II, ki ar ngut ki MLA jong ka People’s Democratic Front (PDF) ki lah ban leit pynïasoh pura noh sha kane ka seng ha kine ki khyndiat sngi.
Kum ban shu pynkynmaw ha kine ki sngi U Nongsaiñ Hima u la thoh ba kin don ar ngut ki MLA kiba don ha ka sorkar MDA-II ki ban leit ban pynïasoh pura noh ïalade sha ka seng NPP.
Haba U Nongsaiñ Hima u la buddien biang halor kane, ki khubor kiba ïajan bha bad ki nongïalam ka NPP ki la ïathuh ba ki ar ngut ki MLA ka PDF ki dei kiba lah ban pynïasoh pura noh sha ka seng NPP.
Kita ar ngut ki MLA ka PDF ki long u Bah Banteidor Lyngdoh uba dei MLA na Mawkynrew konstitwensi, bad u Bah Gavin Mylliem uba dei MLA na Sohra konstitwensi.
Lada kine ar ngut kin rung noh sha ka NPP, ka jingbun briew jong kane ka seng ha Ïingdorbar Thawaiñ kan kiew sha ka 28 ngut ki MLA. Ha ka ilekshon MLA kaba dang shu dep, ka NPP marwei ka la jop haduh 26 ngut ki MLA; 18 ngut na Rilum Garo bad 8 ngut na Rilum Khasi Jaiñtia.
Shuh shuh ki khubor ki ïathuh ba ka jingpyntikna ba kine ar ngut ki MLA ka PDF kin rung sha ka NPP ka dei namar ki nongïalam bahalor ka NPP ki la pyntip sha ki nongkitkam ka seng NPP ha kine ki ar tylli ki konstitwensi ba kin shong jingïalang kyrpang ban pynbeit lada wan rung kine ar ngut ki MLA khnang ban pynkhlaiñ ïa ka NPP.
Ki khubor ki ïathuh ba ki nongkitkam na ki konstitwensi ki la lyngngoh haba ki la ïohsngew ïa kata ka khubor, hynrei ki la hap ban pdiang beit lada ki nongïalam ka NPP kiba nalor ki la pynïaid.
Hynrei haba pyrshang ban pyntikna na u Bah Banteidor bad Bah Gavin halor kane, ym shym la ïoh satia namar ki khlem ai ïa kano-kano ka jubab wat haba la ‘phone’ ïa ki.
Ki khubor ki ïathuh ba lada ka NPP ka la pdiang ïa u Bah Banteidor bad u Bah Gavin, ki kyrtong ka NPP kiba la ïakhun ha kane ka ilekshon MLA kaba dang shu dep, ki la hap shong noh sharud.
Shuh shuh ki khubor kiba tikna ki ïathuh ba ka seng NPP ka kwah ban pdiang ïa kine ar ngut ki MLA hashwa ban thep vote ha Sohïong konstitwensi.
