Shillong, Ïaïong 12:
Hapdeng ka jingshah kynnoh ba ka Sorkar kam leh eiei ban kyrpad na ka Ïingbishar, u Symbud Myntri Rangbah ka Jylla u Bah Prestone Tynsong u la ïathuh ba na ka liang ka Sorkar Jylla ka la leit ban kyrpad ym duna ïa ka lai sien ha Ïingbishar ban nym pyntreikam ïa ka ‘roster system’ naduh ba sdang treikam ka mat halor ka bhah thung kam (reservation policy), hynrei ka Sorkar ka hap ban bud ïa ka hukum ka Ïingbishar kaba bthah ban leh naduh kaba sdang halor ka bhah thung kam.
U Bah Prestone u la ïathuh ïa kane haba kylli halor ka jingdawa ban buhteng shwa ïa ka jingthungkam bad ki jingpynbna lait kam kat bym pat pynbeit ïa ka rukom pyntreikam ïa ka roster system.
U la ong ba ka mat kaba ïadei bad ka roster system ka wan hadien ba ka Ïingbishar ka la pynmih hukum ha u snem 2022 ha kaba la bthah ban pyntreikam naduh ba sdang treikam ka bhah thungkam, kaba mut naduh u snem 1972.
Kumta u la ong ba ïa kane ka mat yn sa ïakren biang ynda la wan u Myntri Rangbah ha kaba yn sa rah ha ka jingïalang jong ka Kynhun Myntri kumjuh ruh ha ka jingïalang jong ka MDA, bad ka jingïalang jong baroh seng saiñ pyrthei (all party meeting).
