Egypt, Iaiong:
Katkum ki jingwad bniah jong ka tnat wad bniah ka United States, la shem ba ka Egypt ka thmu ban phah tiar thma sop-sop sha Russia na ka bynta ka jingleit hiar thma jong ka pyrshah ia ka Ukraine, ha kaba la ong ba u President ka Egypt u Abdel Fattah El-Sisi u la pynlong jingialang bad ki heh ka tnat iada ri naka bynta ban pynbeit ia ki ‘namding bad ki ‘gunpowder’ ban phah sha Russia ha kine ki sngi ban wan. Kumta ruh la ong ba utei u President ka Egypt u la bthah ia ki heh ka tnat shipai ba kin buhrieh bha ia katei ka liengsuiñ ka ban leit kit ia kitei ki tiar khnang ba kan ym don jingthud eiei bad ki ri na West.
Katei ka jingthoh ba la phah da u President ka Egypt ka dei kaba la phah naduh ka 17 tarik u Rymphang.
Kumta la ong ba katei ka jinglap ha kane ka por, ka la pyn lyngngoh ia ki heh nongialam ka United States halor ka jingdonkti jong ka Egypt bad ka Russia na lyndet, da kaba thmu ruh ban ai jingkyrshan ia ka jingleit hiar thma jong ka Russia pyrshah ia ka Ukraine bad kaba long be-aiñ haduh katta.
Kumta ruh u heh ka United States, u Chris Murphy u la ong ba lada katei ka jinglap ba u Sisi u thmu ban phah ia kitei ki ‘namding sha ka Russia, kan long kaba shisha, ka US kan hap ban peit thuh ia ka jingiadei hapdeng ka Egypt bad ka US ha ki por ban wan.
Namarkata ruh la ong ba katei ka jinglap, kan ktah ym tang ia ka jingiadei hapdeng ka Egypt bad ka US, hynrei bad baroh hi ki ri jong ka Middle East bad kumjuh ruh bad ka North Africa.
Ha u Kyllalyngkot jong une u snem 2023, u Secretary of State jong ka US, u Antony Blinken u la iakynduh bad u El-Sii hapoh Cairo, ha kaba ka State Department ka la pyllait ia kawei ka jingpynbna ba u Blinken u la pynpaw paidbah ba ka United States ka ïeng ryngkat bad ka Egypt ban pyrshah ia ka jingleit hiar thma dusmon jong ka Russia pyrshah ia ka Ukraine.
Kumjuh ruh u President ka US, u Joe Biden u la leit jurip sha Egypt ha u Naiwieng jong u snem ba la leit bad u la iakynduh markhmat bad u El-Sisi ha katei ka jingleit jurip jong u. Kumta ruh la ong ba u Biden ha katei ka por u la ïaroh ia ka jingiasnoh kti lang jong ka Egypt ban pyrshah ia ka jingleit hiar thma jong ka Russia.
Hynrei u Mohamed Salah al-Din uba long u Myntri ka tnat iada ri jong ka Egypt, u la ong ba katei ka jingiarap jong ka Egypt ia ka Russia ha kane ka kynti, ka long tang ban pyniadep ia ka jingiarap jong ka Russia ha ki por ba la leit.
Wat la katta, ym lah pat ban tip shai ba aiu ka Russia ka la iarap ia ka Egypt ha kitei ki por ba la leit.
