New Delhi, Iaïong:
Ka jingiaid lynti jong uwei na ki nongialehkai Kriket ka India u Suryakumar Yadav ha ka kam ialehkai ka jong u khamtam eh ha ka kam tied ka lah nang iai long kaba seisoh shuh shuh, ha kaba u tei u rangialehkai u lah nang iaisah biang ha ka kyrdan ba 1 ha ka thup jong ki nongtied ha ka thup kyrdan ba thymmai jong ka ICC T20 World Rankings.
Ka khubor ka iathuh ruh ba utei u rangialehkai ka Mumbai Indians ha ka IPL ba mynta, u la nang iailah shuh shuh ha ka ban pynwandur ka rukom tied bol ka jong u ha ki jngialehkai ba khyndiat over, ha kaba u lah iarap ruh ia ka tei ka kynhun ialehkai IPL ka jong u ban long kaba seisoh bad ba jop dangshen ha ka lympung IPL kaba mynta. Shuh shuh ruh u kapten ka Pakistan u Babar Azam bad u paralok ba ju iatied nyngkonglang bad u; u Mohammad Rizwan ki lah nang iai bteng ha ka ban ialehkai bha shuh shuh, ha kaba u Babar u lah kiew kyrdan mynta ha ka thup kyrdan jong ki rangialehkai bad u paralok jong u pat u iaisah ha ka kyrdan ba 2 ha katei kajuh ka thup.
Shuh shuh ruh ka jingialeh na ka bynta ban khur ia ka kyrdan ba 1 ha ka MRF Tyres ICC Men’s T20I Batter Rankings ka lah nang iai rhem bha, ha kaba lai ngut ki rangialehkai ba paw shakhmat ki iakhun na ka bynta ka kyrdan bad u Mohammad Rizwan bad u Babar Azam ki ioh ia ka lad na ka bynta ban pyndap ia ka jaka ba thylli hapdeng kata hadien u Suryakumar Yadav uba haduh mynta u dang iai long uba bat ia ka kyrdan ba hajrongeh ha ka thup.
Kumta ruh u Babar uba lah kiew sha ka kyrdan ba 3 ha ka thup kyrdan ba thymmai, un ioh shibun ki lad ki lynti na ka bynta ban pyndun ia ka jaka ba heh kaba lah lait thylli ynda ka kynhun ialehkai jong u ka Pakistan kan ialehkai pyrshah ia ka New Zealand ha ka lympung ialehkai T20Is ka ban sa long ha ka sngi saitjain mynta ka taiew.
