Monte Carlo, Iaïong:
Ka jingiaid lynti jong u khlur ialehkai Tennis ka ri Serbia u Novak Djokovic ha ka Monte Carlo Masters ka lah long kaba seisoh naba utei u rang-ialehkai u lah wanphai biang sa shisien sha ka lynti jingjop, hynrei uba lah hap ban nang iai trei shitom shuh shuh ha ka jingiakhun pyrshah ia u nongialehkai na Russia. Katba u Stefanos Tsitsipas na Greece u lah nang iai jam shakhmat ha ka por ba u rangiakhun pyrshah jong u lah shongthait noh na ka jingshitom.
Kumta ha ka jingiakhun u Novak, ka khubor ka iathuh ba u lah pynher sted shakhmat ia ka jingiakhun naduh kaba sdang pyrshah ia uta u rangialehkai na Russia u Ivan Gakhov; ha shuwa ba utei u rangialehkai na Serbia da kaba suk un ioh ban iaid lyngba ha ka lympung iakhun da kaba khur noh shalade ia ki 7-6 (7/5), 6-2 ha ka shi kynta 47min ialehkai. Shuh shuh ruh na ka bynta ban khur ia ka khet jingjop kaba lai na ka lympung ha ka jingbym shym la ialehkai u Rafael Nadal bad Carlos Alcaraz, u Djokovic un hap ban pynkhreh bha shuh shuh ialade na ka bynta ka jingiakhun kaba hadien ka lah ban long bad u Lorenzo Musetti ne bad u Luca Nardi kiba dei ki nongialehkai na Italy ha ka jingiaknieh rung sha ka rynsan iakhun quarter-final.
Kumjuh ruh ha ka lympung, u Tsitsipas u lah jam sha ka kylla iakhun kaba lai hadien ba u Benjamin Bonzi na France u lah shongthait noh na ka jingialehkai namar ka jingshitom bad ha kaba u Stefanos u iai buddien da 4-1 ha ka set iakhun kaba nyngkong. Kumta ruh hadien ka tei ka jingioh rung sha ka wei pat ka kylla, u Tsitsipas u lah ban iakynduh bad u nongialehkai na Chile u Nicolas Jarry ne bad uba na Australia u Alexei Popyrin ha ka jingiaknieh rung sha ka tei ka rynsan iakhun kaba kham shajrong ha ka lympung.
Ha kawei pat ka jingiakhun u Andrey Rublev bad u Alexander Zverev ki long kiba lah khur jingjop da kaba said ha ka jingpynlehnohei set ka jong ki , hynrei u Alejandro Davidovich Fokina u lah khyllem noh na ka jingiakhun ba nyngkong.
Ha kata ka jingiakhun u Rublev, u lah ialehkai bha bad pynsted shakhmat ia ka jingiakhun na ka bynta ban pynliem noh ia u nongialehkai na Spain u Jaume Munar da 4-6, 6-2, 6-2 bad u Zverev u lah pynksan ia ka rukom ialehkai ka jong u ha shuwa ba un lah pynliem noh ia u nongialehkai na Kazakhstan u Alexander Bublik da 3-6, 6-2, 6-4 ha ka jingiakhun ba nyngkong. Hadien katei ka jingjop, u Zverev un hap ban iakhn sa bad u nongialehkai na Spain u Roberto Bautista Agut ha ka jingiaknieh jaka sha ka kylla iakhun kaba lai bad u Davidovich Fokina u lah khyllem noh da 6-2, 6-2 ha u Karen Khachanov. Katba u rangialehkai na Italy u Lorenzo Sonego u lah pyllait im halade ia ki saw dor-thong ialehkai na ka bynta ban pynliem noh ia u nongalehkai na France u Ugo Humbert da 3-6, 7-5, 7-5 bad u ban iakhun pat sa bad u Daniil Medvedev ha ka kylla ba-ar.
