Shillong, Ïaïong 12:
Wat la kim shym la don ïa ki jaka ïalehkai kiba biang kumba long lem kiwei ki jylla jong ka ri, hynrei da ka jingtrei shitom bad minot naduh mynsiem ka la pynlong ïa ki saw ngut ki rangïalehkai ka Jylla hapoh ka lama jong ka Muay Thai Association of Meghalaya ba kin shah jied na ka bynta ban mihkhmat ïa ka ri India sha ka “Seniors Men & Women IFMA WORLD Championship Muaythai” ka ban long ha Bangkok, Thailand.
Kine saw ngut rangïalehkai ki long u Lapynshai Syiemlieh (Under-23) u ban shim bynta ha ka 48kilo, katba ha ka Elite ki long u Pynnehbor Mylliemngap u ban shim bynta ha ka 48 kilo, u Edilbert Ryngdongsngi u ban shim bynta ha ka 85 kilo bad u Skhemborlang Marweiñ u ban shim bynta ha ka 51kilo.
Ka jingshah jied kine ki nongïalehkai ka la wan hadien ba ki lah ban ïalehkai bha ha ka National Mauythai Championship kaba long ha u snem ba la dep ha Madhya Pradesh.
Ïa katei ka lympung ka ban long ha Thailand yn sdang naduh 4 haduh 13 tarik u Jymmang ha kaba kitei ki rangïalehkai kin ïatynjuh bor bad kiwei ki nongïalehkai jong kiwei ki ri.
Ïa ka Muay Thai Association of Meghalaya la seng ha u snem 2016. Hynrei ha kine ki hynñiew snem ba la dep katei ka synjuk ka la leit ïashim bynta ha kylleng jong ka ri bad wat shabar ri ruh kumjuh. Kaba kham sngewtynnad shuh shuh ka long ba ki nongïalehkai jong kane ka synjuk ki ju wanphai sha la ïing ha ryngkat bad ki takma.
Wat la hapdeng ka jinglah ban pynpaw ïa ka jingtbit, hynrei ki nongïalehkai ki ju ïakynduh jingeh ha shwa ban kin leit ïashim bynta shabar. Kane ka long namar ka synjuk ka dang donkam ïa ki lad jingïarap na ka Sorkar naduh ki rynsan ïalehkai (ring) haduh ki tiar ïalehkai.
“Ngi sngewsih ban pyntip ba kum ka synjuk ngim shym la don ïa ka ‘ring’ kaba long kaba kongsan eh na ka bynta ki nongïalehkai hashwa ba kin leit ïashim ha kino kino ki lympung ïalehkai la ka long hapoh ka ri bad wat shabar ri ruh kumjuh,” la pynpaw u President ka synjuk u Bah Anjelus Sun haba ïakren bad ki nongthoh khubor ha Shillong Press Club ha ka Sngi Balang.
“Ngi la leit ïakynduh ïa ka Director ka tnat ïalehkai ka Kong Isawanda Laloo bad ngi la buh ka jingkyrpad na ka bynta ban pynïoh ka jaka kilanmet lem bad ka ring khnang ba kan long jingïarap ïa ki nongïalehkai.”
Ha kaba ïadei bad ka jinglut jingsep na ka bynta ki nongïalehkai ki ban leit sha Thailand ka long T. 5,81,200, katba na ka bynta ki ar ngut ki rephri bad nongbishar kiba kynthup ïa u Bah Angelus Sun bad u Bah Pynsuklang Sumer ka long T. 2,61,000.
“Wat la ka jinglut ka long kaba bun, hynrei ngi la ïoh ïa ka jubab na ka Sorkar Jylla hadien ba ngi la leit ïakynduh ïa u Myntri ka tnat ïalehkai u Bah Shakliar Warjri, uba la kloi ban mang pisa na ka bynta jong ngi,” la bynrap shuh u Bah Sun.
