Shillong, Ïaïong 12:
Ka Khun Hynñiewtrep National Awakening Movement (KHNAM) ka la dawa ban pynsangeh shwa ïa ka jingpyllait paidbah ïa ki jingpynbna lait kam (job advertisements) ban thungkam ha ki tnat bapher bapher ka Sorkar Jylla katba dang ap ïa ka jingpynbeit ïa ka ‘roster system.’
Katkum u kyrwoh lyngba u Vice President ka KHNAM u Bah Thomas Passah, u la ong ba la ïohi ba ka la don ka jingpyllait bun tylli ki jingpynbna lait kam (job advertisements) kiba dei ban thungkam ha ki tnat Sorkar bapher bapher bad la ïohi ruh ba bun tylli kam la mang lypa hapdeng ki jaitbynriew ka Jylla ha kaba la bhah kham bun sha kiwei pat ki para jaitbynriew ka Jylla.
“Namarkata, ngi dawa jur ba kane ka jingkhot ban thep kam (job application) na ka bynta ki kam bapher bapher dei ban pynsangeh shwa kat bym pat pynbeit thymmai ïa ka roster system,” la ong u Bah Thomas.
U Bah Thomas u la ong ba ka KHNAM ka kwah ban phaikhmat shwa sha ka ‘Roster System’ bad ïakren sani ïa kane namar kam long kaba dei ban pyntreikam naduh ba sdang ïa ka Reservation Policy ha u snem 1972, hynrei dei ban sdang pyntreikam nangne shakhmat (prospectively) hadien ba la pynmih hukum da ka Ïingbishar.
Halor ka jingkren jong u Symbud Myntri Rangbah u Bah Prestone Tynsong halor ka Roster System ha kaba u la ong ba ym pat donkam ban khot dorbar kyrpang, hynrei ka Sorkar kan sa khot ïa ka jingïalang jong ka Kynhun Myntri (cabinet) bad ïa ka jingïalang jong baroh ki seng saiñ pyrthei (all party meeting) ban ïakren ïa kane ka mat. Ka KHNAM ka la pynpaw ba ka rynsan kaba biang eh ban ïakren ïa kane ka mat ka dei ha Ïingdorbar Thawaiñ ka Jylla, hynrei lada ka Sorkar ka khot ïa ka jingïalang jong baroh ki seng saiñ pyrthei ruh ka biang eh.
“Ngi pdiang lada lum da ka jingïalang jong baroh ki seng saiñ pyrthei ruh khamtam ïa ngi ka seng ka bym don MLA khnang ba ngin ïoh ka lad ban sei ki sakhi sabut lyngba ki kot ki sla ki ban pynshisha ba ïa ka roster system dei ban pyntreikam shakhmat ym ban ïaid shadien naduh mynshwa. Hynrei hadien ka jingïalang jong baroh ki seng saiñ hima, dei ban khot wut wut ïa ka dorbar ba kyrpang jong ka Ïingdorbar Thawaiñ,” la ong u Bah Thomas.
Halor ka jingong jong ka VPP ba dei tang maka kaba rah ïa kane ka mat bad buh ha ka mat ilekshon bad ba ki paidbah ki dei ban ïatylli mlon tang hapoh ka jingïalam ka VPP, u Bah Thomas u la ong, “ngim kwah ban pyni daw bad kam lei lei lada ngi ïatylli hangno hangno ruh, ka thong hi dei ban ïatylli kawei lada dei ki seng bhalang ne ki seng saiñ hima sima khnang ban pynthikna tang kawei bad kata ka long ba ki samla kin ym duh ïa ka hok jong ki. Na ka liang jong ngi, ngi kren shai ba kane ka mat kam dei ka mat tang jong ka KHNAM hynrei ka dei jong ka jaitbynriew, bad ka KHNAM ka dei tang ka seng kaba rit kaba sngewkhia bad thrang ban pynkylla ïa ka roster system ba kan nym ktah shiliang bad ba ka Sorkar kan nym leh beaiñ.”
U la bynrap ba ki paidbah ki hap ban ïatylli kawei halor kane ka mat khnang ba ki samla ki ban dang wad kam sorkar kim shahknieh ïa ka hok jong ki.
“Ngi ïohi ba bun ki seng kynthup lang ruh ïa ki sengbhalang kiba la kren bha ïa kane ka mat bad ka jingshimkhia lang jong baroh halor kane ka long ka jingkyrmen,” la ong u Bah Thomas.
Kum ban pynkynmaw, ka KHNAM ka dei kawei na ki seng saiñ pyrthei kaba ju kren bha ïa kane ka mat naduh basdang ban thaw ïa ka seng ha u snem 2002 haduh mynta.
Ka KHNAM ka ong ba ka seng kam treh pat ban kam bad ym sngewdei ban kam ba dei tang ka KHNAM kaba kren ïa kane, namarba kane ka dei ka mat jong ka jaitbynriew ha kaba kiwei ki seng ki bym don ha ka saiñ pyrthei ruh ki ju donbynta ban kren ïa kane ka mat.
