Los Angeles:
Ka Rihanna kaba la nang pawnam bad paw pyrthei katba dang iaid ki snem la ioh khubor ba mynta ka la knieh noh ia ka nam jong ka Katy Perry ban long ka kynthei kaba don bun ki nongbud ha Twitter.
Ki khubor ka Hollywood ki iathuh ba ka Rihanna ka la bat mynta ia ka kyrdan kaba nyngkong kum kaba don bun ki nongbud ha Twitter bad ka Katy ka la rung noh ha ka kyrdan kaba ar.
Ka Rihanna kaba long ka nongrwai, ka hehspah mynta u snem ka la nang paw pyrthei shuh shuh hadien ba ka la leh sa ia kiei kiei kiba kham pher ha ka jingim jong ka bad kiba la pynlong ruh ia ki samla ban shah khring bha ha ka.
Kawei ruh ka daw halor ka jingpawnam bad paw pyrthei jong ka Rihanna ka dei ruh hadien ba ka la seng la ka jong ka kompani pynmih jingtah pynbha briew ka Fenty. Kane ka nongrwai kaba dang shu wan shim bynta ha ka Super Bowl Halftime Show ka la paw ruh na ka bynta ki jingrwai kiba ka la rwai bad ki thup jing rwai kiba sngewtynnad kiba ka la pynmih.
Ka Rihanna nalor shibun ki kam ba ka trei ka la iohlad ruh ban seng la ka jong ka kompani pynmih jaiñ kaba long kyrpang tang na ka bynta ki kynthei.
