Shillong, Ïaïong 12:
Ka Executive Committee ka Khasi Hills Autonomous District Council (KHADC) ka la pynmih ïa ka jingpynbna ba ki nongsynshar shnong naduh ki Syiem, Sirdar, Sordar, Rangbah Shnong, Matabor, ki dei ban ai syrnod nongshong shnong sha u nongshong shnong uba dei u Khasi tang uba shim ïa ka jait ka khong na ka kynthei katkum ka kyndon jong ka Khasi Hills Autonomous District (Khasi Lineage) Act 1997.
U Executive Member (EM) ba khmih ïa ka tnat Elaka jong ka KHADC u Bah Jambor War u la ong ba katkum ka aiñ Khasi Lineage 1997, ym dei ban ai syrnod nongshong shnong sha uno uno uba shim jait na u shynrang bad ïa kane la kdew ha ka kyndon kaba 3 bad 12 jong ka aiñ.
U EM u la ong ba ki la don ruh kiba pyrshang ban ai jait sha u shynrang hynrei lada kim ïoh ïa ka syrnod shwa na ka Council, kan eh ïa ki ban ïoh ïa ka syrnod Schedule Tribe. U la ong ba kane ka lynti ka long ban pynkhlaiñ ïa ka rukom ai jait kmie kaba la ïaid naduh ki por hyndai hynthai.
“Ngi la bthah ïa ki khlieh nongsynshar ba kin ai ïa ki syrnod nongshong shnong katkum ka Sections 3 bad 12 jong ka Khasi Hills Autonomous District Khasi Social Custom of Lineage Act, 1997, ha kaba tang kito kiba bud ïa ka tynrai jong ka jingpyndonkam ne shim jait na ka kynthei kin ïoh ka jingithuh kum u Khasi,” la ong u Bah Jambor War.
Nalorkata, u la ong ba ka jingpynmih ïa kane ka hukum ka long katkum ka aiñ ban ïada, pynneh bad pynkhlaiñ ïa ka rukom ai jait na ka kynthei ba la ju bud ryntih da ki Khasi.
“Kito kiba pyndonkam da ka jait na u Kpa, yn nym ithuh ïa ki kum ki Khasi bad ha kaba la bthah ïa ki khlieh nongsynshar ba kim dei satia ban ai kano kano ka syrnod nongshong shnong sha ki,” u la ong bad bynrap ba la bthah ba ki dei ban peit bniah bad pynshisha ïa ka thymmei jong kito ki nongaplai.
Ha kajuh ka por, la pyntip ruh ba ka KHADC ka la khang pyrshah ïa ki khlieh nongsynshar shnong, ki rangbah shnong ba kin kiar na kaba ïashim bynta ha ki kam politik lane ban rung dkhot ha kino kino ki seng saiñ pyrthei.
Kane ka rai ban khang pyrshah, ka dei kaba la shim naduh ka 15 tarik u Lber da ka Council ha ka jingïalang jong ka executive committee. U Bah Jambor u la ong ba kane ka hukum kam dei shuh kaba thymmai, hynrei ka dei tang ka jingpynkynmaw sha kito ki briew ba lada ki khlieh nongsynshar shnong ki don bynta ha ki kam politik, ka lah ban ktah ïa ki kam pynroi ha ki shnong ki thaw.
