Shillong, Ïaïong 12:
Ka Meghalaya Energy Corporation Limited (MeECL) ka don jingthmu ban shna ïa ka Myntdu Leshka Stage II Project ban pynmih kumba 210 MW ka bording hajan ka shnong Bataw, East Jaiñtia Hills.
Katkum ka jingpynbna ba la pynmih da ka Meghalaya State Pollution Control Board (MSPCB), la ong ba ka MeECL ka la pan jingbit na ka Ministry of Environment Forests & Climate Change jong ka Sorkar India ha ka bynta kaba ïadei bad ka mariang (Environmental Clearance) kumba la buh ha ki kyndon jong ka E.I.A. Notification No. S.O. 1533 kaba14 tarik Nailur, 2006 bad Amendment E.I.A. Notification No. S.O. 3067 (E), kaba 1 tarik Nohprah, 2009.
Katkum ka kyndon ha ka Para 7(i) III jong katei ka Notification, u Deputy Commissioner ka East Jaiñtia District, Shillong lyngba ka shithi No. EJHD/REV-320/2022/38 jong ka 24 tarik Lber, 2023, u la buh tarik ban pynlong ïa ka Jingpynsngew Paidbah lane ka ‘Public Hearing’ ha ka shnong Bataw, East Jaiñtia Hills Distrik ha ka 10 tarik Jymmang, 2023 naduh 11 baje mynstep ha kaba yn pdiang ïa ki jingpynsngew, jingai jingmut bad jingujor jong ki paidbah kiba lah ban shah ktah da ka jingpyntreikam ïa kane ka Project.
Ka MSPCB ka la ong ba kito kiba kwah ban ïashim bynta ha kane ka Jingpynsngew Paidbah ki lah ban pule ïa ka jingkynthoh shaphang ka Environmental Impact Assessment jong ka Project ba la thoh ha ka ktien Khasi bad Phareng kaba la buh ha ki shlem treikam u DC, East Jaiñtia Hills, Khliehriat, u Chief Conservator of Forests, Ministry of Environment & Forests, Govt. of India, North-Eastern Regional Office, Lumbatngen (Law-U-Sib), Shillong, u B.D.O., Khliehriat Block, u Secretary, Jaiñtia Hills Autonomous District Council, West Jaiñtia Hills, Jowai, Librarian, District Library, Khliehriat, East Jaiñtia Hills, bad MSPCB ha Shillong.
Shuh shuh la ong ba ka jingkynthoh shaphang ka Environmental Impact Assessment jong kane ka Project la buh ruh ha ka internet lyngba ka website jong ka Board – www.megspcb.gov.in/publichearing.html na ka bynta ban ïoh pule ki paidbah baroh.
Halor kane ka bynta, ka MSPCB ka la pyntip ba ka khot sngewbha ïa ki paidbah baroh ban ai ïa ki jingpynsngew, jingai jingmut ne jingujor jong ki halor kiei-kiei kiba lah ban ktah ïa ka mariang na ka jingpyntrei ïa kane ka Project.
Kino-kino ki lah ban ai ïa ki jingpynsngew, jingai jingmut ne jingujor jong ki da ka jingthoh bad phah ïa kita ki jingthoh da ka Registered Post sha u Member Secretary, Meghalaya State Pollution Control Board, ‘ARDEN’, Lumpyngngad, Shillong 793014, bad ban pynpoi ha lane shwa ka 10 tarik Jymmang, 2023.
Kito pat kiba kwah ban pynsngew da ka ktien ki lah ban leh ha ka Jingpynsngew Paidbah ka ban long ha ka 10 tarik Jymmang, 2023. La ong ruh ba ïa ki jingpynsngew, jingai jingmut ne jingujor da ki jingthoh lane da ka ktien yn ym lah shuh ban pdiang hadien ba la dep ka Public Hearing.
Lah ban kdew ba ka Myntdu Leshka Hydro Electric Project (MLHEP) ka dei ka ‘Run-of-River’ Project, bad ka Myntdu Leshka Stage-I ka dei kaba pynmih 126 MW (3×42 MW) ka bording.
