Manchester, Iaïong:
Katkum ka khubor ba lah pyllait da ka klob ialehkai phutbol ha ka English Premier League ka Manchester United la long ba u rangialehkai shakhmat ba tbit jong ka u Marcus Rashford un sa duh ban iadonlang bad ka kynhun ialehkai baroh kawei ha ka jingiakhun quarterfinal jong ka lympung Europa League kylla ba nyngkong pyrshah ia ka Sevilla na ka daw ka jingshitom kynsan ki doh-ksah ha ki kjat.
U Rashford u long ruh uwei na ki nongialehkai uba bat ia kyrdan ba hajrong ha ka jinglah ban kamai bun kol ha ka aiom ialehkai ba mynta kata da 28 kol ha baroh ki lympung iakhun. Utei u rangialehkai u la ioh ia katei ka jingshitom ha ki bynta ba shapoh jong ka kjat kamon ha ka jingialehkai ha-iing pyrshah ia ka Everton bad khur ia ka jingjop da 2-0 kol.
Ka jingbym shym la lah ka jong u ban iadonlang ha ka kynhun ialehkai baroh kawei na ka bynta ki jingiakhun ba hadien ka long ka jingduhnong kaba khraw ia ka kynhun baroh kawei, ha kaba u lah pynrhem shuh shuh ia ka ding kaba ju iai klang ha ka kynhun baroh kawei ha ka aiom ialehkai ba mynta. Hynrei kan don ruh ka lad na ka bynta jinglah jong u ban wanphai biang sha ka kynhun na ka bynta ki jingialehkai ba donkam tam eh jog ka kynhun ha ki kut taiew jong ka aiom ialehkai kaba mynta.
