Shillong, Ïaïong 12:
Shi bynta ban plie lad ïa ki rangïalehkai kiba tbit na kiwei pat ki kyrdan ïalehkai, ka Shillong Sports Association ka la pynmih ïa ka kyndon kaba thymmai na ka bynta ka Shillong Premier League mynta ka aïom.
Mynta ka kynti ki phra tylli ki klob jong ka SPL ki lah ban shimwai ïa ki rangïalehkai na ki klob jong kiwei pat ki kyrdan ïalehkai. Na ka liang ka SSA ka la ïohi ba ki don shibun ki rangïalehkai kiba don ïa ki sap ïalehkai ba kyrpang bad kiba ïalehkai ha kiwei pat ki kyrdan ïalehkai, hynrei mynta ka kynti ki lah ban leit ïasoh (loan) sha ki klob SPL.
Ha kane ka aïom ïa ka lympung ïalehkai SPL la thmu ban sdang naduh u Nailur hadien ba ka SSA kan lah ban pyndep ïa baroh kiwei ki kyrdan ialehkaiï.
Ha kawei pat ka liang ka SSA ha ka sngi Balang ka la pyntip ba ki la don haduh 52 ngut ki rangïalehkai kiba la pyndep ïa ka jingsoi kontrak na ka bynta ka ‘inter-club transfer’, hynrei la khmih lynti ba kiwei pat ki rangïalehkai kin lah ban pyndep hashwa ban kut ha ka sngi Saitjaiñ.
Ka SSA ka la ïaid shakhmat ïa ka U-10 bad kumjuh kan sa pynlong sa ïa ka U-14 boys ruh ïa ka Women’s League mynta u bnai. Ynda la kut kine, ka SSA kan pynlong sa ka U-20 Fourth Division ha u Jymmang, ka Third Division ha u Jylliew, Second Division ha u Naitung bad ka First Division ha u Nailar.
