Tokyo, Iaïong:
Ka Sorkar Japan ha ka step Sngi Palei, ka la pynkynriah bad bthah ruh ia ki paidbah nongshong shnong jong ka ba kin mih noh na Hokkaido hadien ka jingther ‘namding jong ka North Korea ha katei ka step. Katba ki heh ka tnat iada ri jong ka Japan ki la iathuh ba utei u ‘namding um shym lah ban poi sha ki thaiñ jong ka North Japan.
La ong ba ha katei ka sngi, ka Sorkar Japan ka la kyntu ia ki paidbah ba kin mih noh mar-mar na katei ka thaiñ namar ka jingma kaba khraw, kaba ap na katei ka jingther ‘namding jong ka North Korea ha katei ka sngi.
La ong ba ia utei u ‘namding ba la pynher da ka North Korea, la ap khmih lynti ba un leit hap bad hiar madan ha ka por kumba 8 baje jong katei ka step Sngi Palei.
Hynrei la ong ba tang hadien khyndiat por, ki bor pyniaid ka Hokkaido ki la pynbna ba kam don shuh kano kano ruh ka jingma na katei ka jingpynher ‘namding jong ka North Korea bad ba kan ym ktah eiei ia kitei ki thaiñ ba don ki nongshong shnong.
Ki tnat pahara duriaw jong ka Japan, ki la ong ba utei u ‘namding u la lah ban dep bthei ruh namar khlem shym iohi ne lap ia ka jingbthei jong u watla ki la pynkhreh bad ap khmih lynti bha.
Hynrei la ong ba ki bor pyniaid ka Japan kim shym la pyntip tikna ba hangno utei u ‘namding un leit hap ne bthei, hynrei la shu pyntip ba ka Japan kam don jingma shuh na utei u ‘namding.
