Shillong, Ïaïong 13:
Ka Voice of the People Party (VPP) kan pynlong ïa ki jingïalang paidbah ban ai jingpynshai kaba tikna ha kaba ïadei bad ka ‘roster system’ bad kumjuh ïa ka jingdkoh ha ka kpait saiñ kam (policy) halor ka jingbhah kam ka jylla kaba la wanrah ka jingduhnong kaba khraw ïa ki khun samla.
Ha ka kyrwoh khubor ba la pyllait da u nongaiktien ka seng u Dr Batskhem Myrboh u la ong, ka VPP ha ka kylla ba nyngkong kan pynlong ïa ki lai tylli ki jingïalang, kata ha ka 17 tarik mynta u bnai yn pynlong ha Madan Heh, Mawlai ha ka por 2 baje nohphai sngi, ha ka 19 tarik yn pynlong Iawmusiang, Jowai ha ka por 12 baje mynsngi bad ha ka 20 tarik pat yn pynlong ha Jaïaw ha ka por 2 baje nohphai sngi.
Ka kyrwoh ka ong ba kum ban shu pynkynmaw, ka VPP ka hap ban shim ïa kane ka lynti ban pynlong da ki jingïalang paidbah dei namar ka jingleh bym suitñiew jong ka sorkar MDA 2.0 ïa ka jingkyrpad jong ka seng ban pynlong ïa ka dorkar ba kyrpang jong ka Meghalaya Legislative Assembly ban ïatai sani halor kane ka mat ba donkam eh.
Ka jingkuman jong kane ka sorkar ka pynpaw shynna ïa ka jingbym salia ïa ka jingshah ktah jur ki samla Khasi-Jaiñtia bad ki samla ba don jingduna ha ka dkhot met. Shuh shuh la ong ba ka jingbym khot ïa ka dorbar kyrpang ka long kumba ñiew dewthala ïa ka ïingdorbar thawaiñ, kaba dei ka jaka ban ïakren ïa ki mat ki jura kiba ktah ïa ki paidbah da ki nongmihkhmat ba la jied hi da ki paidbah, la ong ka kyrwoh.
Dei halor kitei ki daw ba la kdew haneng, ka VPP ka hap ban pynlong noh da ki jingïalang shabar ka ïingdorbar thawaiñ namar katba nang pynslem ïa ka jingkhmih biang ïa ka ‘roster system bad ïa ka kpait saiñ kam halor ka jingbhah kam kan nang kynton shuh shuh ïa ka jingeh kaba la dep ban mad.
Kumta, la kyrpad ïa ki paidbah ban ïa mih ryntih lang ban wan ban sngap ïa ka jingpynshai ki nongïalam jong ka VPP halor kane ka bynta, la pynkut ka kyrwoh khubor.
