Shillong, Ïaïong 13:
Ki don haduh 101 ngut ki rangïalehkai kiba la lah ban pyndep ïa ka jingsoi soskular sha ka miej jong ka Shillong Sports Association (SSA) na ka bynta ban kynriah noh sha kiwei pat ki klob.
Ïa kane ka jingsoi soskular jong ki rangïalehkai na ka bynta ban ïalehkai noh sha kiwei ki klob ne Inter Club Transfer la sdang naduh 3 tarik mynta u bnai. Haduh ka Sngi Balang ki la don haduh 52 ngut kiba la wan sha ka miej jong ka SSA ban pyndep ïa kane ka bynta.
Hynrei ha ka Sngi Palei ki la don sa 49 ngut kiba la lah ban pyndep. Kane ka jingsoi soskular ka dangsah sa ar sngi bad kan kut ha ka Sngi Saitjaiñ.
Kumta na ka liang katei ka synjuk ka la thmu ban sdang shwa ïa ka U-20 Fourth Division ha u Jymmang ka ban pynbud pat sa ka Third Division ha u Jylliew, Second Division ha u Naitung bad ka First Division ha u Nailar. Katba ïa ka Shillong Premier League yn pynlong ha u Nailur.
