Shillong, Ïaïong 13:
Ka lympung ïalehkai Women’s Cricket League 2022-23 ka la sdang ha ka Sngi Palei ha madan Polo ha kaba ka SCA (A) bad ka WKHDA ki la khur ïa ka jingjop.
Ha kane ka jingïakhun ka SCA (A) ka la pynliem noh ïa ka SCA (B) da 9 wiket. Ka SCA (B) ka la shimti ban tied nyngkong ha kaba ka la kamai 58 run bad shah pynkhyllem 8 wiket ha ki 20 over. Ka Chandani Kumari ka la tied 21 run na ki 36 bol bad ka Ankita Sharma ka la ïoh 10 run na ki 23 bol. Katba ka Suriti Ray bad ka Solina Jaba ki la khur mar 2 wiket na ka bynta ka SCA (A).
Haba shimti ïa ka pali kaba ar, ka SCA (A) ka la kynjoh sha ka thong da kaba kamai 61 run bad shah pynkhyllem 1 wiket ha ki 7.2 over. Ka Suriti Ray ka la tied 31 run na ki 27 bol bad ka Mansi Anand ka la ïoh 11 run na ki 19 bol. Ïa ka nam Man of the Match la ïoh da ka Suriti Ray na ka SCA (A).
Haba phai sha kawei pat ka jingïakhun kaba ar, ka WKHDA ka la jop da 73 run ïa ka SWKDA. Ka WKHDA kaba la tied nyngkong ka la kamai 132 run bad shah pynkhyllem 4 wiket ha ki 20 over. Ka Abiser ka la tied 46 run na ki 37 bol bad ka Dubleen ka la ïoh 16 run na ki 21 bol. Katba ka Banrishisha bad ka Rebeldalis ki la khur mar 1 wiket na ka bynta ka SWKHDA.
Haba wan beh ïa ka thong, ka SWKHDA ka la kamai tang 59 run bad shah pynkhyllem 1 wiket ha ki 17.4 over. Ka Fulnessy ka la tied 7 run na ki 19 bol bad ka Indarikor ka la ïoh 6 run na ki 28 bol. Katba ka Daiak ka la khur 4 wiket bad 2 wiket da ka Emisakani. Ïa ka nam ’Thei jong ka jingïalehkai la ïoh da ka Daiak na ka WKHDA.
