London, Iaïong:
U Myntri ka tnat pla tyngka jong ka Britain, u Jeremy Hunt ha ka Sngi Balang u la pynbna ba ka Britain ka long ba la kloi ban airam biang sa $500 Million sha ka Ukraine, bad kaba la nang kyntiew ruh ia ka pisa baroh ba ka Ukraine ka la ioh na ka Britain ha une u snem sha ka $1 Billion.
U Hunt u la ong ba katei ka ram ba la mang da ka Britain naka bynta ka Ukraine, ka long kumba $15.6 Billion naka bynta ki 4 snem ki ban wan bad ia katei ka pisa la phah sha Ukraine lyngba jong ka International Monetary Fund, ia kaba la ioh ban iashong jingialang ‘Spring Meeting’ ha Washington ha ki khyndiat por ba la leit.
Namarkata, la ong ba katei ka mang tyngka kan long ban kyntiew ia ka ioh- ka kot jong ka Ukraine bad ba kan pynkhlaiñ ia ki jingdonkam jong ka hapdeng ka jingshah hiar thma bad jingshah thombor ha ka Russia ha kine ki snem.
Ia katei ka mang tyngka ba yn ai ram sha ka Ukraine, la wanrah shwa da ka jingthoh hapoh ka iing dorbar thaw aiñ jong ka Britain ha u Bnai ba la lah.
Kumta, la ong ba ka Britain ha kane ka kynti ka la kular ban phah ia 6.5 Billion Pound (lane kumba $ 8.1 Billion) kum shi bynta ban ai jingkyrshan ia ka Ukraine ha kum kane ka por ba ka Ukraine ka dang mad ia shibun ki jingeh na ka jingshah thombor ha ka Russia bad ba kan lah ruh ban pynmih biang ia ki jingduh nong bad ba kan lah ban khie khlieh biang noh haba iadei bad ka ioh ka kot jongka ha kane ka por.
Shuh shuh ruh u Hunt u la ong ba nalor jong katei ka mang tyngka ba la buh naka bynta ka Ukraine, la pyntam ruh sa $670 Million naka bynta ka Poverty Reduction & Growth Trust jong ka IMF, bad kumjuh ruh sa $3.3 Billion naka bynta ka Resilience & Sustainability jong ka IMF hi, khnang ba ka Ukraine kan ioh ban pynbit pynbiang ia u paidbah ka ri haba iadei bad ka jingkylla ka suiñ bneng.
La ong ba ka jingkiew dor hapoh Britain ka lah ban poi sha ka ‘Average’ 6.8% ha une u snem, katkum ka jingpeit thuh jong ka IMF, bad kaba la hiar na ka 9.1% ha u snem 2022.
