Shillong, Ïaïong 13:
Ka seng Hynñiewtrep Youths’ Council (HYC) hapoh ka jingïalam jong u Bah Robertjune Kharjahrin ki la leit ban ïakynduh bad ai da ka jingthoh ha u Chief Secretary ka jylla Meghalaya, u Bah Donald P. Wahlang halor ka jingpyntreikam ïa ka Roster System hapoh ka jylla.
Haba kren bad ki lad pathai khubor hadien ba la dep ban ïakynduh bad u Chief Secretary ha ka sngi Palei, u Bah Robertjune u la ong ba ka seng ka la dep ban ïakren bad u Chief Secretary halor lai tylli ki mat, kita ka Roster System, ki kam ba lait thylli kiba khlem pat lah satia ban pyndap bad kumjuh ruh halor ka Reservation kaba ïasoh lang lane ka Combined Reservation hapdeng ki Khasi, Jaiñtia bad ki Garo.
U Bah Robert u la ong ba ka seng ka wanrah da ka jingthoh ban dawa na ka sorkar ba lada ka dei ban jied naduh kano ka por yn pyntreikam ïa ka Roster System kumba la bthah da ka ïingkashari ka jylla ka Meghalaya High Court ban jied, ka seng ka kwah ba ïa ka Roster System ka dei ban treikam shakhmat ym ba kan treikam shadien.
“Ïa kane ka jingkwah ka jong ngi, kam shym dei ka jingdawa biej ne ka jingdawa kaba khlem da pynshong nongrim, hynrei ngi la pynshong nongrim ïa kane ka jingkwah ban pyntreikam shakhmat da ka hok jong ka ïingkashari kaba hakhlieh duh ka Ri ka Supreme Court,” la ong u Bah Robertjune.
U la ong ba ïa katei kajuh ka jingthoh yn sa phah ruh sha u Myntri Rangbah ka jylla, u Conrad K Sangma bad sha baroh ki nongïalam jong ki seng saiñ hima bapher bapher khnang ba kin ïoh ban ïakren halor kane ha ka jingïakynduh lang jong ki baroh.
“Ngi la ai jingmut ïa ka sorkar ba kan pynbeit thymmai ïa ka Office Memorandum (OM) halor ka Roster System namar ha ki kyndon jong ka, la kdew shai ba ka jingpyntreikam ïa ka Roster kan dei naduh u snem ba la mynjur ba ka Reservation Policy kaba mut naduh u 1972 bad kan treikam ha ka jingthungkam ha ki tnat sorkar. Lada ngi peit pat ïa katkum ka Resolution jong ka Reservation Policy ha u 1972 la ong ba ïa kino kino ki ‘post’ ba dei bhah kawei napdeng ki kynhun jaidbynriew lada dei ba kim lah ban pyndap na ka jingduna kiba aplai ne kino kino ki daw la kdew ba ïa kata ka bhah jong ki yn rah sha u snem uba bud ban kheiñlang lang nalor ka 40% ba la bhah lypa ha ka jingthungkam,” la ong u Bah Robert.
U Bah Robert u la ong ba ka Reservation Policy ka kdew ruh ba lada kiwei napdeng kine ki kynhun jaidbynriew kam lah ban pyndap tang mar shiteng na ka 40%, ïa kane ka bhah jong ki yn pynjlan haduh lai snem. Lada kim lah ban pyndap ha u snem ba lai, ka bhah na kito ki snem ba kim lah pyndap kan kut noh (lapse) bad ha ka Office Memorandum ïa ka Roster pat la bthah ban thungkam biang da kaba pynshong nongrim naduh u 1972 bad kane ka don ka jingïatyngkhuh bad ka Reservation Policy.
U la ong ba katkum ka jingkam ka sorkar ba ka don ka jingbthah ka High Court ban pyntreikam ïa ka Roster System naduh u 1972 ha ka PIL ba la ujor da ka Zenera R Marak, hynrei ha ka hukum ba ka pynmih haba shong bishar ïa ka PIL ba la ujor da u Greneth M Sangma ka kdew ba ka shong ha ka sorkar bad ka ïingdorbar thawaiñ ban buh ïa ka snem ot kyrteng ne ‘cutoff date’ na bynta ka jingpyntreikam ïa ka Roster.
“Ngi mynjur ba ka don ka jingbym shai ki hukum ka High Court bad ngi sngew ban ong ba lada ka don ka jingbym shai ïa kitei ki hukum ka High Court ka sorkar ka dei ban shim nuska na ka rai bishar ka Supreme Court (SC) haba ka pynmih ïa ka hukum haba shim bishar ïa ka mukotduma RK Sabharwal Ors vs state of Punjab & Ors haba pynkhreh ïa ka roster system namar ha ka rai bishar ka SC ka kdew ba ka jingpyntreikam ïa ka Roster ka dei beit naduh u snem ba la mynjur ïa ka shakhmat ym ban phai shadien,” la ong u Bah Robert.
U la ong ba namar ïa ka OM la mynjur da ka Kynhun Myntri na kata ka daw ka shong tang ha ka mon ka Kynhun Myntri ban pynbeit ïa kane ka jingduna ha ka Roster system.
“Lada ka sorkar ka khot tang ïa ka jingïalang ka Kynhun Myntri ka la lah ban shim rai ban pynbeit, hynrei lada ka khot da ka jingïalang jong baroh ki seng saiñ pyrthei kumba la kam da u symbud Myntri Rangbah ka jylla lei ka kham bha bad lada khot lei da ka dorbar kyrpang kata lei kaba bha tam, namar ka sorkar ka thmu ban khot ïa ka jingïalang baroh ki seng saiñ pyrthei na kata ka daw ngin pynpoi ïa ka kopi ka dorkhas sha baroh ki nongïalam seng saiñ pyrthei ha ki ryngkat ki rai bishar ba ngi aiti lang ha u Chief Secretary,” la ong u Bah Robert.
U la ong ruh ba katkum ka Reservation Policy la kdew ba ki kam kiba lait kiba dei ha ki kyrdan district la bhah beit 80% ïa ki Khasi- Jaiñtia bad Garo ha kajuh ka bhah khlem da bhah shuh 40% ïa ki paid Khasi-Jaiñtia bad 40% ïa ki paid Garo.
“Hynrei ki don ki tnat kiba khot thep kam ha ki kyrdan district kiba bhah 40% ïa u Khasi-Jaiñtia bad 40% ïa u Garo kaba long mar pyrshah ïa ka kyndon ka Reservation Policy, bad na ka liang u Chief Secretary u la mynjur ba lehse ka don ka jingduna na ka liang kata ka tnat bad u la kular ban pynbeit ïa kata ka mat,” la ong u Bah Robert.
Namarkata, u Bah Robert u la ong ba ka sorkar ka dei ban peit bha ïa kane ka jingrhem ka ding ha kaba ïadei ba ka jingdawa pynbeit ïa ka ‘Roster System’. Ka dei ban shimkhia ïa kane ka mat kaba rhem ïoh ba ka ding kan klang ha kano kano ka por kumba la jia ha ka jingïakhih ïa ka mat MBOSE ha ki por ba la leit.
