Shillong, Ïaïong 13:
Ki ar ngut ki MLA na ka People’s Democratic Front (PDF) kiba dang shu jop biang ha kane ka ilekshon MLA ba dang shu dep ki lah ban rung pura noh sha ka seng National People’s Party (NPP) ha ka taïew ban wan.
Katkum ki khubor kiba la ïoh lum na ki nongkitkam ka NPP, la ïathuh ba kine ki ar ngut ki MLA kin sa rung pura sha ka seng NPP la shem taïew hadien ba ki nongïalam kiba hakhmat ka seng NPP kin wanphai shapoh ka jylla na ka jingleit shabar ka jylla.
Kine ki ar ngut ki MLA ka PDF ki long u Bah Banteidor Lyngdoh na Mawkynrew konstitwensi bad u Bah Gavin Mylliem na Sohra konstitwensi kiba hap ha East Khasi Hills District.
Haba u nonglum khubor u la pyrshang ban phone ïa kine ar ngut ki MLA bad ki nongkitkam ka PDF kim shym la shim wat haba la mih ka khubor ba kin rung noh sha ka seng NPP.
Ki khubor kiba ïajan ki la ïathuh ba ka jingïakren ban rung kine ar ngut ki MLA PDF sha ka NPP ka la tikna, hynrei ki ap satang ïa ka sngi ba kin pynïasoh noh.
Ha kawei pat ka khubor, ki nongkitkam ka PDF ryngkat kine ki ar ngut ki MLA kin sa shong kyrkieh ïa ka Central Executive Committee (CEC) mynta ka taïew ban ïakren la kin pyndam syndon ïa ka seng PDF ne kin shu mih tang ki MLA ryngkat ki katto katne ki nongkitkam haba ki leit rung sha ka seng NPP.
Shuh shuh ki khubor ki ïathuh ba ka jingrung noh pura ki ar ngut ki MLA ka PDF sha ka NPP ka long ban pynkhlaiñ ïa ka seng NPP haba kan ïakhun ïa ka ilekshon kaba dang sahteng ha Sohïong konstitwensi ka ban long ha ka 10 tarik Jymmang, 2023.
