Nongpoh, Ïaïong 13:
Ki nongïalam ka Ri Bhoi Youth Federation (RBYF) Sengkmie bad Raid Nongtung Circle ha ka Sngi Balang ki la leit ban noh jingïarap da ki ben bad ki miej ïa kawei ka skul kaba la shna hi da ki paidbah kaba don ha ka shnong Ummat-2, ka shnong khappud ha Ri Bhoi kaba hap ha Raid Nongtung bad kaba la ju tip kum ka Block-2.
Ha katei ka sngi ba ki nongïalam ka RBYF ki la leit ban ïarap ïa katei ka skul lyngba ki ben bad ki miej la sakhi da ka jingdon lang u Bah Neverson Makdoh, dkhot ka RBYF Sengkmie, u Bah Shining Shadap, General Secretary ka RBYF Raid Nongtung Circle, u Bah P Makri, Rangbah Shnong Ummat-2 lem bad ki paidbah na katei ka shnong.
Ka jingleit ai jingïarap da ka RBYF hapoh ka St. Joseph English Medium School, ka la pynkmen ïa ki paidbah hapoh katei ka shnong, namar ka dei ka skul kaba ki dang shu shna ha kine ki khyndiat snem. Ka jingshna ïa kane ka skul ka long na ka bynta ba kin ïoh ban pynleit skul ïa ki khun ki kti bad kiba la shu synñiang da ka pisa kaba T.150 na ki kmie ki kpa jong uwei u khynnah khnang ba kin ïoh ban siew ïa ka tulop jong kiba hikai ïa ki khynnah.
Nalor ka jingïarap ïa katei ka skul, ki nongïalam ka RBYF ki la ai ruh ka jingkular ba kin ïaleh ban thaw ïa ki lad jingïarap ïa ka skul khnang ba kan long ka jingmyntoi ïa ki heprit bad ïa ki briew ha katei ka shnong.
