Shillong, Ïaïong 13:
Ka Shillong Lajong Football Club kan pynkhreh ïa ka jingïakhun kaba nyngkong ha la ïing jong ka lympung ïalehkai Second Division League pyrshah ïa ka United Sports Club kaba na Kolkata ha ka Sngi Thohdieng.
Ïa kane ka jingïakhun yn pynlong ha ka por 2 baje noh phai sngi ha madan Third Ground, Polo.
Kane ka kynhun hapoh ka jingïalam u Bah Bobby L. Nongbet, ka la bat ïa ka kyrdan ba hakhlieh na ka Group-B da kaba kamai 6 dor-thong (point). Kane ka la wan hadien ba ka lah ban khur jingjop ha ar tylli ki jingïalehkai ba la dep pyrshah ïa ka East Bengal da 1-0 kol bad ïa ka Diamond Rock Football Club da 1-0 kol.
Kumta kane ka kynhun ka donkam ban ïalehkai bha ha kane ka jingïakhun ha la ïing kumba ka la buh ruh ka jingkyrpad ïa ki paidbah ba kin wan sakhi bad ban ai mynsiem ïa ka klob khnang ban kan khur ïa ka jingjop ha kane ka jingïakhun kaba nyngkong eh ha la ïing.
Nalor kane ka jingïakhun pyrshah ïa ka United, ka Lajong kan pynkhreh ruh ïa ar tylli ki jingïakhun ha la ïing ha ka 19 tarik pyrshah ïa ka Diamond Rock Football Club bad ïa ka East Bengal ha ka 29 tarik.
