West Indies, Iaïong:
Katkum ka khubor ba lah pyllait da ka Cricket West Indies (CWI) ka iathuh ba ka lah weng noh mynta ia u nongkawang bol barim jong ka kynhun ialehkai Kriket ki shynrang ka West Indies u Courtney Walsh na ka kam shakri kum u nongialam ba ha khliehduh jong ka kynhun ialehkai Kriket ki kynthei. Kane ka wan hadien ba ka kynhun hapoh ka jingialam ka jong u kam shym la lah ban jam shakhmat ne ban shah jied na ka bynta ban ialehkai ha ka rynsan iakhun Knockout jong ka T20 World Cup ha South Africa.
Kumta ha kaba iadei bad katei ka bynta, na ka liang jong ka synjuk ka iathuh ba shen kan sa sdang noh ia ka kam ha ka ban thung da u briew ba thymmai u ban shimti ia katei ka kam bad kumjuh ruh ki nongiarap jong ka kynhun ha kaba ia ka kontrak jong ki ruh um shym la pynthymmai satia na ka daw jong ka jingbym shym la lah ban ialehkai bha da ka kynhun ha ka Women’s T20 World Cup, ha kaba katei ka kynhun ka lah shah rem noh ha ka England bad kumjuh ruh ha ka India ha ka jingialehkai sdang ka jong ka jong ki ar tylli ki jingialehkai bad kaba lah wan balai ha ka group ba ka don watla ka lah rah ia ka jingjop pyrshah ia ka Ireland & Pakistan.
Ha ka samoi treikam jong u Walsh kaba lah sdang naduh u Risaw 2020, u la lah ban btin lynti ia ka kynhun baroh kawei sha ka jingjop ha ki jingialehkai ha-iing bad kumjuh ruh Shabar pyrshah ia ka Pakistan bad ioh jaka ruh sha ka Semifinal ha ka 2022 ICC Women’s 50-over Cricket World Cup ha kaba ka kynhun ka lah shah liem noh da ka said ha ka kynhun Australia kaba lah rah ia ka thong jingjop.
Nalor ba u long u dkhot jong ka ICC Hall of Fame, ka CWI ka lah shim ruh ia ka rai na ka bynta ban ym pynthymmai shuh ia ka jingiateh kontrak ka jong ki Technical Assistant kata u Robert Samuels bad Corey Collymore hadien ba lah dep ban khmih bad bishar bniah ia ka jingtreikam ka jong ki.
Katei ka kam kaba u Walsh u lah shah pynkhamti ha ka kynhun ka long ruh ka kam shakri kaba nyngkong kaba u lah ioh ban bat ha ka kyrdan ialehkai Shabar, watla u lah dep ban trei teng bad ka kynhun ialehkai na Bangladesh kum u nonghikai kawang bol bad uba lah iadonbynta ruh ha ka ban wad nongialehkai ba tbit bad kum u nonghikai kawang bol sted ha ka kynhun ialehkai IPL ka Kings XI Punjab.
