Geneva, Iaïong:
Na ka liang jong ka synjuk pyniaid jingialehkai phutbol jong ka ri Europe baroh kawei ka Union of European Football Associations (UEFA) ka pynbna paidbah ba ka lah ioh mynta haduh 3 tylli ki jingtyrwa-iathong na ka ri Bilat bad Ireland, Turkey & Italy na ka bynta ka jingkwah jong ki ban ioh ia ka hok ban pynlong ia ka lympung ialehkai European Championship ha u snem 2028 bad 2032.
Kumta ha kaba iadei bad katei ka bynta, ka khubor ka iathuh ba kita baroh ki kynthup ia ka jingiathong-lang mynta kum ka jingiasnohktilang ka jong ki, kata na ka ri Bilat bad Ireland ia kaba lah mihkhmat da ka Football Associations of England, Northern Ireland, Ireland, Scotland & Wales na ka bynta ka jingtyrwa jong ki hakhmat katei ka synjuk ha kaba iadei bad katei ka lympung ialehkai ha u snem 2028. Shuh shuh ruh, katba ka ri Turkey ka pynpaw ia ka jingkwah jong ka ban iathong na ka bynta kawei na ki snem jong ka lympung kata jong u snem 2028 ne 2032.
Ki nongpyniaid bahalor jong katei ka synjuk ki iathuh ruh ba ka synjuk pyniaid jingialehkai phutbol na ka ri Italy ka Italian Football Federation ka lah dep ban phah ia ki kot ki sla kum ka jingtyrwa jong ka na ka bynta ban ioh ia ka hok ban pynlong ia katei ka lympung ialehkai ha u snem 2032. Hynrei ka na ka liang jong ka EC (Executive Committee) jong ka UEFA ka iathuh ba kan sa shim ia ka rai ba khatduh ha u bnai Risaw mynta u snem na ka bynta ban pynkhamti ia ka hok sha kitei ki ri na ka bynta ka lympung ialehkai ha kitei ki snem ban wan.
