Shillong, Ïaïong 13:
Ka Mawmluh Cherra Cements Employees Union (MCCEU) kaba dei ka synjuk ki nongtrei ka karkhana shna dewbilat ha Sohra ka la pynkynmaw biang ïa ka Sorkar Jylla haba ïadei bad ki lai tylli ki mat jingdawa kiba la sahteng naduh u snem 2018 kynthup ïa ka skhim na ka bynta kiba dei ban shongthait mon sngewbha lane ka Voluntary Retirement Scheme (VRS).
Hynrei namar ba kine ki jingdawa ki dang sahteng, ki nongïalam ka MCCEU ki la ong ba lada kane ka long sah kumne, kan pynlong ïa ki nongtrei ban nym lah shah shuh bad kin hap ban mudui da ka Public Interest Litigation (PIL) ha Ïingbishar.
Haba kren sha ki lad pathai khubor ha ka Sngi Palei, u President ka MCCEU u Bah Shanlang Diengdoh bad u General Secretary u Bah Pynskhem Lyngdoh ki la ïathuh ba ha ka shithi kaba la phah sha ka Sorkar lyngba ka shlem treikam u Myntri Rangbah, na ka liang ka Union ka la pynsngew ïa ka rai ba la shim da ka Executive Committee ban pynkynmaw biang ïa ka Sorkar ba kan pynurlong noh ïa ki lai tylli ki jingdawa.
Ki jingdawa ki kynthup ïa ka jingsiew tulop tista ïa ki nongtrei ka MCCL bad ban pyllait ïa ka pisa kaba sah katba dang ap ïa ka karkhana ba kan treikam. Kaba ar ka dei ka jingdawa ban pynsted noh ban pyntreikam ïa ka karkhana MCCL ha ryngkat ka jingkyntiew kyrdan ïa ka, bad kaba lai ka long ban pyntreikam ïa ka skhim shongthait mon sngewbha lane ka Voluntary Retirement Scheme.
Haba ïadei bad ka VRS, u Bah Diengdoh u la ong ba katba nang ïaid ki por ki don ki nongtrei kiba la dei ka rta ban shongthait na ka kam, bad kane ka la nang buh jingeh shuh shuh ïa ki nongtrei namar kim ïoh ïa ka pisa kaba dei hok ban ïoh, bad buh jingkylli ïa ka Sorkar haduh lano ka Sorkar kan pyntreikam ïa ka VRS na ka bynta ki nongtrei kiba kwah ban shongthait noh.
Ka MCCL kaba dei ka karkhana shna dewbilat kaba la paw ha ki phew snem ba la leit, ka la sangeh treikam ha kine ki khyndiat snem. Kane ka la pynlong ïa ka Sorkar ban wad lad kumno ban pynkhie im biang ïa kane ka karkhana da kaba wanrah ïa ka rukom treikam kaba don bynta lang hapdeng ka Sorkar bad kano kano ka kompani shimet kaba kloi ban donbynta lang.
