London:
Ka khubor ba la ioh ka iathuh ba u Prince Harry un sa shim bynta ha ka jingkiew khet u Charles ka ban long ha u bnai ban wan ha kaba u Harry ula dep ban phah jingtip sha Buckingham Palace ba un sa wan ban shim bynta lem ha kaba iadei bad kane ryngkat bad kiwei kiwei ki dkhot ka iing syiem.
Ka 6 tarik jong u bnai ban wan kan long ka sngi ha kaba ka pyrthei hi baroh kawei kan sakhi ia ka jingkiew khet u Charles III bad ha kaba iadei bad kane la khot sngewbha ia ki heh ki haiñ jong ki ri ka pyrthei ban wan sakhi.
U Prince Harry uba la shong la sah ha US hadien ba ula mih noh na UK ula shah khot sngewbha ban wan sakhi ia ka jingkiew khet u kpa ha kaba u Harry hi wat lada um shim don jingiadei shuh bad ka iingsyiem pynban un wan ban sakhi ia kane.
Ki khubor kiba la ioh ki iathuh ba ka Meghan Markle ka kurim u Harry kan yn wan sha UK ha kaba iadei bad kane bad kan shong beit ha Califor nia lem bad ki khun ki kti jong ka.
Ka dei ha ka sngi Balang ba ka Bucking ham Palace ka la pynmih khubor ba u Harry ula dep phah jingtip ba un wan ban sakhi ia ka jingkiew khet u kpa ka ban long ha West minster Abbey .
Ka jingkiew khet u Charles kan long kaei kaei kaba ki nongshong shnong ka Britain kin sa ioh ban sakhi bad u Charles u la shimti ia ka khet Syiem hadien ka jing khlad noh ka kmie ka Queen Elizabeth II ha ka 8 tarik u Nailur ha ka rta kaba 96.
Ha u bnai ban wan kan don ruh ka jinglehkmen leh sngewbha jong ki nongshong shnong ka UK hadien ba ki la ioh da u syiem thymmai ha kaba kan don ruh ka jingiabam iadih sngewbha ban pdiang sngewbha ia u bad bun ki heh ki haiñ jong ki ri ka pyrthei kin sa ioh ban don bynta lang ha kaba iadei bad kane.
