Astana, ïaïong:
Ki nongialympat ka ri napdeng ki kynthei, ka Antim Panghal (53kg) ka la lah ban khur noh shalade ia ka takma Rupa katba ka Anshu Malik (57kg), Sonam Malik (62kg), Manisha (65kg) bad Reetika (72kg) ki long kiwei pat ki thei ialympat ka ri kiba la lah ban khur noh shalade ia ka takma Rnong. Kitei baroh ki nong-ialehkai ki dangsah ha ka lympung bad ruh ban pyndep ia ka jingiaid lynti jong ki ha ka lympung iakhun kaba mynta ka Asian Wrestling Championship da ka jingioh ban kiew ha ka rynsan deng takma.
Ha ka jingkhur jingjop jong kitei ki nongialehkai, ka lahduh U-20 ha ka pyrthei ka Antim ka la lah ban pynliem noh ia ka nongialympat na Singapore ka Hsiao Lim da 10-0, katba ka nongialehkai na China ka Li Deng 6-0 bad kaba na Uzbekistan ka Aktenge Keunimjaeva da ka ‘By Fall’ na ka bynta ban rung sha ka phainal bad pynthikna ruh ia ka jingkhur takma ba nyngkong na ka lympung.
Kumta ha ka jingiaknieh rah nam lahduh pyrshah ia ka World champion 2021 bad kaba dang iai bat ia ka nam jop ha ka lympung ka Akari Fujinami na Japan, ka Antim ka lah shah rem noh da 0-10 na ka bynta ban dang iaisah biang sa shisien ha ka takma Rupa.
Katba ka Anshu ka la lah ban tem pyrshah ia ki jingiakhun jong ka na ka bynta ban khur pat sa ia ka takma ba saw ha kaba katei ka nongialehkai ka lah ialehkai bha pyrshah ia ka nong Singapore ka Danielle Lim da 11-0 bad ia ka nong China ka Qi Zhang da 5-4; ha shuwa ba ka Anshu kan shah pynrem noh da 1-5 ha ka jingiakhun semifinal pyrshah ia ka nongialympat na Japan ka Sae Nanjo. Shuh shuh ruh, ka Anshu ka lah pynliem noh ia ka nong Mongolia ka Erdenesuvd Bat Erdene da 10-0 na ka bynta ka jingkhur shalade ia ka takma Rnong.
Ka Manisha ka lah iohlad ban ialympat bha pyrshah ia ka nong Mongolia ka Shoovdor Baatarjav da 2-1 bad ia kaba na Uzbekistan ka Ariukhan Jumabaeva da ka ‘By Fall’ ha shuwa ba katei ka nongialehkai ka ri kan mad ia ka jingshah pynrem noh da 0-11 ha ka nongialympat na China ka Lia Long.
Shuh shuh ruh ka Manisha ka lah shah pynkhyllem madan ruh ha ka nong Japan ka Mahiro Yoshitake ha ka semifinal; kata ha shuwa ba kan khyllie pat ialade ha ka jingiakhun na ka bynta ban pynliem noh ia ka nongialehkai na Kazakhstan ka Albina Kairgeldinova da ka ‘By Fall’ ha ka jingiakhun jong ki na ka bynta ka takma Rnong.
Hynrei ka Reetika ka lah pynliem noh ia ka nong Kyrgyzstan ka Nurzat Nurtaeva da 6-3 hynrei kaba lah shah pynrem noh da 4-5 ha ka nongialympat ba tbit na Japan ka Sumire Niikura ha ka jingiakhun semifinal jong ki.
Ka long ruh ka nongialympat ka ri kaba lah thaw rekod da 5-1 jingjop pyrshah ia ka nongialehkai na Uzbekistan ka Svetlana Oknazarova na ka bynta ban khur noh shalade ia ka takma Rnong.
Na katei ka lympung ialehkai mynta u snem, ki thei ialympat ka ri ki la lah ban khur haduh 7 tylli ki takma kaba kynthup ia 2 tylli ka takma Rupa bad 5 tylli ka takma Rnong.
