Shillong, Ïaïong 13:
Ka Hill State People’s Democratic Party (HSPDP) ka la pynpaw ba ka jingpyntreikam ïa ka Roster System ka dei ban long shakhmat ym naduh shadien, bad na ka liang ka seng ka la pynrung ruh ha mat kular ilekshon ïa kane, kata ka long ban peit bniah biang bad pynbha ïa ka mat bhah thungkam.
U President Bah K.P. Pangniang u la ong ba kane ka mat ka la don ha ki mat kular ilekshon jong ka seng ha kane ka ilekshon bad ïa ka ‘roster system’ la sngew dei ban pyntreikam shakhmat ym ban leit shadien.
Ka HSPDP ka dei ruh kawei na ki seng saiñ pyrthei kaba la ju kren ïa kane ka mat bad khamtam ka jingdawa Jylla la kajong ka Khasi-Jaiñtia State.
U Bah Pangniang u la ong ba ynda la wan u Myntri Rangbah yn sa ïakynduh ban pynsngew ha u ïa kane khamtam kum u Chairman ka MDA-II.
Haba kylli la ka donkam ban khot dorbar kyrpang halor kane, u la ong ba ban rah ïa kane ha ka rynsan jong ka MDA ka dei kaba biang kumba la leh ïa ka Gaming Act namarba ka kynhun synrop ruh ka dei ka lad ban pynsngew ïa ki mat jingeh kiba dei jong ki paidbah kumba la buh ha ka mat ilekshon.
U Symbud Myntri Rangbah u Bah Prestone Tynsong u la dep ïathuh ba ïa kane ka mat yn sa ïakren ha ka jingïalang jong ka Kynhun Myntri kumjuh ruh ha ka jingïalang ka MDA bad ka jingïalang jong baroh ki seng saiñ hima.
