Shillong, Ïaïong 13:
U President jong ka Meghalaya Pradesh Congress Committee (MPCC) u Bah Vincent Pala bad uba dei ruh u MP ka Shillong u don ka jingkyrmen kaba skhem ba ka Congress kan sa ïoh ïa ka jingjop ha ka ilekshon MLA ka ban long ha Sohïong Konstitwensi namar ki paidbah ki la ngiah ïa ka sorkar synroplang ha ka jylla.
“Ha ka jingïalang kaba ngi la ïashong mynne ryngkat ki nongïalam bad nongkitkam ka Congress lem bad u kyrtong ban ïakhun na Sohïong, uba la pynpaw ba katkum ka jingïaid lynti u don ka jingkyrmen ba skhem ban jop ïa ka ilekshon,” la ong u Bah Pala.
Une u nongïalam ka Congress ha Meghalaya u la ong, “Ki don ar tylli ki daw ba ka Congress kan jop ïa ka ilekshon, kawei ka dei ba u Bah Samlin Malngiang, uba la jop ïa ka ilekshon kaba la dep na ka HSPDP u la phet noh na kane ka seng bad ban ïakhun na ka NPP, ka seng kaba ki paidbah ki la pyrshah bha”.
Kawei pat ka daw kaba la pynpaw da u Bah Pala, ka long ba u Bah Synsharlang Kupar Lyngdoh, kyrtong ka UDP u dei uba khlem kyrshan satia ïa u (L) Bah HDR Lyngdoh ha ka ilekshon MLA 2018 ha ka por ba u ïakhun na ka Congress. Kumta ka jingsngewlem kan ym treikam ïa u briew uba la donkti ha ka ban pynrem ïa la u jong u Mama bad ki paidbah ka Sohïong ki sngewthuh kham bha ban ïa kiwei pat ki briew kiba nabar ka konstitwensi.
Shuh shuh u la ong ba kane ka ilekshon kan dei ruh kaba kongsan bha bad kum ka seng kan trei shitom ban jop khnang ba ïa ka kam Nongïalam ka Liang Pyrshah ha ka ïingdorbar thawaiñ ka jylla yn ïoh ban bat da ka Congress.
“Ngi kyrpad ïa ki paidbah ba kin pynjop ïa u kyrtong ka Congress khnang ba ka jylla kan ïoh ïa ka Liang Pyrshah kaba khlaiñ bad ki paidbah kim dei ban ngop ha kino-kino ki jingshah pynbieit,” la bynrap u Bah Pala.
