Shillong, Ïaïong 14:
U Chief Secretary ka Jylla, u Bah DP Wahlang, u la ïathuh ba ka Sorkar ka dang thaw lad ban ïoh ïa ka jaka pynlang jaboh shabar bad kham jngai na nongbah Shillong.
U Bah Wahlang u la ong ba kumba ka long mynta, ka jaka pynlang jaboh ha Mawlai ka dei kaba dang pyndonkam namar ki don ki jingshna sboh bad shna thymmai biang ïa ki tiar ki tar, bad lada ym dei ba ki dang don ki kam kiba leh ha kane ka jaka, katta kam long shuh kaba bit ban pyndonkam.
Kumta u la ong ba ka Sorkar ka la shim ki lad ki lynti ban ïoh ïa kawei pat ka jaka pynlang jaboh bad kane ka kam ka dang ïaid shakhmat.
Haba kylli kumno ka Sorkar kan leh namar ki don kiba pyrshah bad kim ai jaka ban shim ka Sorkar ban shna jaka pynlang jaboh, u Chief Secretary u la ong ba ka don kawei ka rukom kaba tip kum ka NIMBY (Not In My Backyard) kaba dei ka jingbatai ba ngi lah ban don ka jaka pynlang jaboh tangba kam dei ban don hajan ïing ne jaka sah briew.
U la ong ba ïa kane ka rukom dei ban pynshai bad ai mynsiem ïa ki nongshong shnong ba kin sngewthuh ba ngi donkam ïa ka jaka pynlang jaboh tangba ka dei ban don kham pajih na ka jaka ba shong ki briew.
