Shillong, Ïaïong 14:
U Symbud Myntri Rangbah ka Jylla, u Bah Prestone Tynsong uba peit ruh ïa ka tnat kam pohïing, ha ka Sngi Thohdieng u la ong ba kawei na ki jingeh kaba ka tnat pulit ka ïakynduh ka dei ha ka liang ka jingduna palat ki nongtrei – ym duna ïa ka 3500-4000 ngut.
Haba kren sha ki lad pathai khubor hadien ka jingïalang khmih bniah bad ki heh pulit ha Police Headquarters, u Bah Tynsong u la ong ba ka tnat kan sa pyndep lut ïa ka jingpynrung kam ban pyndap ïa ki kam ba sah thylli ha ka tnat hapoh jong une u snem.
U la ïathuh ba ka jingpynrung kam haba ïadei bad kumba 1000 tam (ki kam) kiba sah thylli ha ki kyrdan bapher-bapher jong ka tnat pulit ka dang ïaid.
U la ong ruh ba ïa ki ‘Personal Interview’ yn sa pyndep ha kine ki 2-3 taïew ban wan bad hadien kane, yn sa ïaid shakhmat bad ka jingthung kam.
Katkum ka jingïathuh jong u, ka jingpyndap ïa kine ki jaka ba sah thylli kan ïarap shi kat dei ha ka ban kyntiew ïa ka jingkyrmen bad jingskhem jingmut jong ka tnat pulit ban shakri kham bha ïa ki paidbah ka Jylla khamtam haba phai sha ka shong suk shong shngaiñ.
U la ong ruh ba ka Sorkar ka dang khmih ban nang kyntiew shuh-shuh ïa ka jingkhlaiñ jong ka tnat pulit, kata na ka 16,000, da kaba mang shuh ïa ki kam thymmai.
Ha kawei ka liang, u Symbud Myntri Rangbah ka Jylla u la bynrap ba ka tnat pulit shen kan sa pynïeng ïa ki ‘Barrack’ ha ki 7 tylli ki ‘Police Outpost’ ba dang dep shna thymmai kiba don ha shi lynter ki jaka khappud bad ka Assam nalor ka jingphah pulit shuh ban khmih ïa kitei ki ‘Outpost’ bathymmai.
Na ka liang u Director General of Police (DGP), Dr. L.R. Bishnoi u la ong ba ka tnat pulit ka la shim ïa ki sienjam ban pynbeit ïa ki jingbakla ba la kdew da ka ïingbishar ka Jylla haba ïadei bad ka jingkynnoh shalan be-aiñ ïa u dewïong.
Haba kren sha ki lad pathai khubor, u Dr. Bishnoi u la pynsngew ba ka buh jingeh shi kat dei ban tehlakam ïa man la kawei-pa-kawei ka jaka jong ka Jylla namar ka jingduna palat ki nongtrei.
Na ka liang jong u, u la ong ba ki pulit ki pyrshang katba lah ban tehlakam ïa kito ki lynti kiba ju thmu ban shalan tuh ïa u dewïong.
Shuh shuh haba phai sha ka shong suk shong shngaiñ, u DGP u la ong ka jinglong-jingman ka long kaba suk ba saiñ.
Haba bynrap ba ka tnat ka ïoh ka jingïatreilang na ki paidbah, u Dr. Bishnoi u la ong ba ka tnat kan hap long kaba la khreh na bynta jingtynjuh hadien-habud.
