Da u Bah Philip Marweiñ
Kumba la thung (appointed) Bishop ia u Phadar Wilbert Marweiñ jong ka Nonbah Parish (Nongstoiñ) da u Pope Francis ha Rome ha ka 4 tarik u Rymphang 2023, ka jingpynkyntang Bishop ïa u kan long ha ka 16 tarik u ïaïong, 2023 ha Cathedral Parish, Pyndengrei, naduh ka por 9.30 A.M. ïa ka jinglehniam pynkyntang Bishop yn pyndep da u Arch-Bishop Victor Lyngdoh jong ka Shillong Arch-Diocese.
Ha kane ka Riti lehniam lehkyntang ki don bun ki jnit ki jnat pynsleh pynkhuid pynkyntang bad pynkupbor ha ka kyrteng U Blei U Kpa, U Blei U Khun bad U Blei U Mynsiem Bakhuid bad yn ïeng sakhi kyrpang da u Nongmihkhmat jong u Pope ha India, u Arch-Bishop Leopoldo Girelli, ki Arch-Bishop, ki Bishop jong kane ka thain North East India, ki Lyngdoh, ki kynhun riewniam bad ki paid byllien jong U Blei. Ka jinglehniam kaba kum kane kan long kaba shongkun bha ka bym ju don khah khah laitnoh tad lada don jingpynkyntang Bishop biang hadien lehse ha ha Jowai Diocese, kaba shu sah khlem Bishop la kham slem.
Kum ban shu plie pyrda ïa ka ba mynshuwa, ïa u Bishop Wilbert Marweiñ la kha ha ka shnong Rangblang Sohsyniang (kaba la pynmih bun ki Lyngdoh bad riew-niam) ha ka 17 tarik u Rymphang 1970. U kpa u dei u Oswald Thyrniang bad ka Kmie ka Priska Marweiñ (baroh ar ki la leit noh sha U Jisu), u dei u khun bahynriew jong phra ngut shipara. U hymmen Nyngkong u dei u Terencius (RIP) bud sa u Clarencius (RIP), u Primus, u Delphinus, u Desiderius, u Basil (RIP) bad ka para Khatduh, ka hep Stella Marwein. Ha iing kmie-kpa jong u Bishop don mynta sa ka para Khatduh, u Kynum Jong u, u Maximum Sangriang bad ki 6 ngut ki khun rit Jong ki (ki Pyrsa jong u Bishop). Ha Rangblang Sohsyniang u Bishop u dang don ki meinah bad ki kur bad bun bha ki Kha ki man. Bun ruh ki kur jong u ki la mih na Rangblang bad ki la saphriang kylleng ki jaka.
Shuh shuh shaphang u Bishop Wilbert, u la leit skul step ha shnong ha St. Mary’s Secondary School ryngkat bad ka ap masi mynsngi kumba lai snem ei ei. Ynda u la pyndep ia ka Klas VII ha shnong u sa leit skul kum u aspiran ha St. Paul’s Minor seminary 3 Mer (Upper Shillong) ban pyndep ïa ki klas pule kiba dang sah ryngkat ki jingshah saindur shuwa ban long u riewniam Brodar. U la leit pule philosophy ha Christ King College, Laitumkhrah bad ia ka Theology ha Oriens Theological College Mawlai. La pynkyntang Phadar ïa u ha ka 27/4/2003 ha Parish Rangblang da u Arch-Bishop Dominik Jala. U la shakri kum u Symbud Parish Priest ha Ummulong Parish 3 snem. Hadien kata kum u Nongpeit ïa ki jingdonkam ka ïing (Procurator) jong ka Oriens Theological College Mawlai 3 snem.
U la leit pule Kham bniah shuh shuh ïa ka kam ban long u Nongsharai ha ka kam jong u Trai bad ïa ki paid jong U Blei (Missiology) ha Rome 4 snem kynthih (2007-2010). U la long u Assistant Parish Priest ha Parish Santa Maria Consenza, Italy, 5 snem tam bad ha ka snem 2015 u la hab ban Wanphai noh sha la ka Diocese lajong ban wan shimti kum u Parish Priest jong ka Nonbah (Nongstoin Town) Parish haduh ki sngi ba Un shimti kum u Bishop jong ka Nongstoin Diocese. Shipor u la long u Vicar General jong kane ka Diocese Nongstoin ruh.
Ka Nongstoiñ Diocese ka kynthup ia ka geographical area ka ba heh kumba 3800 Sq. km kynthup ia ka Eastern West Khasi Hills District, South West Khasi Hills District bad ka West Khasi Hills District ha ka ba don kumba 5.85 Lakh ngut ki briew. Tang ki Katholik ki don kumba 2 Lakh ngut duna. Kine ki don ha ki 22 tylli ki parish : ha Mairang, ha Nongkhlaw, ha Kynshi, ha Nongkasen, ha Mawthong, Mawkyrwat, Munai, Nonghyllam, Mawpat, Rangblang, Nonbah, Mawkhlam, Maweit, Cathedral Pyndengrei, Rambrai, Umwahlang, Riangdo, Nongjri, Umdang, Shallang bad Riangdim.
Naduh ka snem 1950 kham bun na kine ki Parish ki hap ha ka jingpyniaid na Marbisu ba la khlieh da u mishoneri u ba snar na dewlynnong Malta, u Phadar Carmelo Attard, SDB. Baroh kitei ki jaka, bun na ki kim pat don katholik, ki hap ha ka jingkhmih na Lumtyngkong Parish Laitumkhrah hapoh ka jingkhmih ki snar mishoneri German, na ka sengniam Salvatorian bud sa ki snar misho-neri na ka sengniam Salesian na Italy.
Uwei na kine ki snar mishoneri uba tur tyngeh ia ka raimaw raidieng jong ka Ri Khasi, khamtam ha West Khasi Hills u dei u Fr. Constantine Vendrame, SDB ia u ba la khot u Apostol jong ki Khasi-Jaintia. ïa ka Nongstoin Diocese la seng ha ka 28/1/2006 bad u Bishop u ba Nyngkong u la long u Victor Lyngdoh, u ba long mynta u Arch-Bishop jong ka Shillong Arch-Diocese. Mynta dang ap khmih lynti dik dik na ka Holy See na Rome ban thung noh sa ka u Bishop jong ka Ri Jaintia – Ri Pnar.
