C. B. Iawphniaw
Kane ka rukom jied ïa u Syiem ha Bri u Hynñiewtrep kam da long kaba pynhun ïa ki khun ki hajar ka Hima. Balei hap ban kdew ïa ka jingduna ba kat ïa u Syiem ka Hima kiba jied ki long tang 30 bad 40 ngut ei ei kiba dei kita ki myntri bad ki Basan kiba mih khmat na ki katto katne ki kur. Ha ka jingshisha ïa u Syiem la dei ban jied da kiba bun napoh ka Hima. Kiba ioh bynta ban jied ia u Syiem kin long man la ki shnong kiba hap hapoh ka Hima. Lada bun ki nongjied kan kham bha bad kham shongkun ka iktiar Syiem. La kumno kumno la dei ban ioh jied Syiem uwei man la ki shnong kiba hapoh hapoh ka Hima. Haba u Syiem u synshar ïa ki khun ki hajar ka Hima. La dei ban ioh bynta lem baroh ki shnong hapoh ka Hima. Kum ka nuksa la dei ban shim ia baroh ki Rangbah shnong na ki shnong kiba hap hapoh ka Hima ban jied ïa u Syiem. Kane ka rukom ka kham sngew ïahap kat ïa u Syiem ka Hima ban shu ïa jied tang da ki katto katne ngut kam sngew dei ha kane ka juk synshar paidbah. Wat ïa u Rangbah shnong ki dang jied bun ngut wat la dei ki shynrang makna ka la kham shong-khia bad pynhun ia ki nongshong shnong. Namar ki nongjied la kumno kumno kim duna ïa ka 500 bad 600 ngut ban jied ïa u Rangbah shnong. Pyrkhat kat ïa u Syiem lei yn jied tang da ki lai phew bad saw phew ngut kam ia hap haei haei ruh. Ka District Council kaba dei kata ka bor kaba dei peit ïa ka dustur ka riti ka la dei ban pynkylla noh ïa kane ka rukom jied kaba shu bat sah ïa ka rukom kaba la tymmen bad ka bym ïa hap shuh ha kine ki sngi ba mynta. Kane ka long na ka bynta ka jingbha bad jinglong ryntih ha ka synshar ka khadar ha ka Hima. Ka rukom jied ruh dei ban jied da ka Secret Ballot ym shuh ban shu ïa tan briew kum ka juk ring mraw hyndai. Kane ka long ka jingïohi jongnga kat kum ka jingïaid jong ka por. Ne phi ong kam ïahap kum kane ka rukom ïa khlieh nongsynshar Hima.
