Shillong, Ïaïong 14:
Ki ar tylli ki wah ha nongbah Shillong kiba la ju bna nam kum ki wah kiba khuid bad long ban sum ban sait, kita, ka Wahumkhrah bad Umshyrpi ki la rung ha ka thup jong ki 45 tylli ki wah kiba jaboh tam ha India kumba la buh da ka National Green Tribunal (NGT) ha ka thup jong ka.
Ïa kane la ïathuh da u Chief Secretary ka Jylla, u Bah DP Wahlang haba ai ka jingbatai shaphang ka jinglong jingman jong ki wah bad ki hukum bad jingbthah kiba la pynmih da ka Ïingbishar bad ka NGT kiba dei ban bud ryntih khnang ban ïada bad pynneh ïa ka jingkhuid jong ki wah.
U Chief Secretary u la ai ka jingbatai ha ka jingïalang kaba la long ha sngi Thohdieng ha Yojana Bhavan, Secretariat halor ka jingpynim biang bad wanrah biang ïa ka burom ba la jah jong ki wah (rejuvenation and restoration of major rivers) kiba kynthup ïa ka Wahumkhrah, Umshyrpi ha nongbah Shillong bad ka Wah Umkhen.
Ha kane ka jingïalang, la ïashimbynta lang da u Myntri Rangbah u Conrad K Sangma, u Symbud Myntri Rangbah Bah Sniawbhalang Dhar, u Myntri Sorkar Bah A L Hek, u Chief Secretary Bah D P Wahlang nalor ki heh ophisar na ki tnat treikam bapher bapher ka Sorkar bad ki nongmihkhmat na ki Dorbar Shnong bad ki kynhun bapher bapher.
U Chief Secretary u la batai shaphang ka jingjaboh jong ki wah bad ki lad kiba dei ban shim kumno ban ïada ïa ki wah. Nangta u la pynsngew ruh ïa ki hukum bad ki jingbthah jong ka Ïingbishar bad NGT kumno ban pynneh ïa ka jingkhuid jong ki um ki wah.
Kumta u Chief Secretary u la khot la wer ïa ka jingïashimbynta bad ïasnohkti lang jong ki shnong ki thaw bad baroh ki nongdon bynta lang kum ka KHADC, ki Dorbar Shnong, bad ki seng bapher bapher ban pynshai pynsngewthuh ïa kane.
Ha ka jingkren jong u, u Myntri Rangbah u Conrad K Sangma u la kren shaphang ka jingthmu jong ka jingïalang bad ki lad ki ban sa shim na ka bynta ban pynim biang bad wanrah biang ïa ka burom ba la jah jong kine lai tylli ki wah da kaba pan ruh ïa ka jingai jingmut bad ban ïashimbynta lang ki Dorbar Shnong bad ki shnong ki thaw ha kane ka sienjam.
U la ong ruh ba ka long kaba donkam ban ïa biang lang hapdeng ka mariang bad ka ïoh ka kot bad kane ka jingïalang ka dei shibynta na ka thong jong ka Sorkar Jylla ban wanrah ka jingïabiang lang hapdeng ki lad kamai kajih, ka ïoh ka kot bad ka mariang khnang ban lah ban pynneh ïa ki jingdonkam na ka bynta ka ïoh ka kot bad ban pynneh pynsah ïa ka mariang na ka bynta ki pateng ban wan.
U Conrad u la ong ruh ba ka Sorkar ka long kloi ban shim ki lad ki lynti ban pynneh ïa ki um ki wah ha kane ka Jylla ha kaba u la pyni ruh katto katne ki sienjam kiba ka Sorkar ka la shim ban ïakhun ïa ka jingkylla ka suiñbneng naduh ka jinglum ïa ki jaboh jabaiñ, ban nym pyndonkam plastik, ka jingpynduna ïa ka jingjaboh ka lyer, ka jingpyndonkam ïa ki kali ilektrik bad kiwei kiwei ki lad ki lynti kum ka jingthung dieng bad jingshimbynta lang ki paidbah ha ki shnong ki thaw nalor ka jingdonbynta ki khynnah pule bad ki samla lyngba ki prokram bad lynnong jingpule ha ki jaka pule.
Ha kane ka jingïatai, la donlang ki dkhot kiba mihkhmat ïa seng bad kynhun bapher bapher.
Ha kawei pat ka liang, haba ïakren bad ki nongthoh khubor, u Chief Secretary u la ïathuh ba ki don 32 tylli ki jaka kiba la dep ban ithuh ha shi lynter ka Wahumkhrah bad Umshyrpi ban buh ïa ki ‘sewage Treatment Plants (STP)’ lada ki jaka pynkhuid um jaboh bad kito kiba pyntuid beit beit ïa ka um jaboh sha wah, kin shah daiñ kuna kaba heh bha.
Nalorkata, u Chief Secretary u la ong ba la ai por 45 sngi ïa ki bor ba dei khmih ban shim ki lad ban pyrkhing ïa ka jingtih maw tih shyiap harud jong ka Wah Umkhen kaba dei ka wah kaba kongsan ban tan umbam umdih ïa ka sor Shillong.
