Nongpoh, Ïaïong 14:
U MLA barim ka Umroi konstitwensi, u Bah George B. Lyngdoh ha ka Sngi Thohdieng u la pynpaw ka jingsngewkmen hadien ba ka Ministry of Rural Development (MoRD) jong ka Sorkar Kmie ka la mang tyngka na bynta ban shna ïa 2 tylli ki surok hapoh konstitwensi kiba la jot rathai bad buh jingeh shi kat dei ïa ki paidbah mynta la kumba 20 snem tam.
Kine ar tylli ki surok kiba kynthup ïa ka surok na Bhoirymbong sha Mawbseiñ ha ka jingjngai kaba 14 kilo mitar bad ka surok na Nongthymmai sha Khyndewso ha ka jingjngai kaba 10 kilo mitar la mang tyngka lyngba ka Pradhan Mantri Gram Sadak Yojana (PMGSY) ha ka jinglut kaba kot sha ka T. 17.88 klur.
U Bah Lyngdoh u la pynpaw ïa kane lyngba ka rynsan ‘Twitter’ ha kaba u la ai ruh ka jingïaroh sha ki ophisar ka tnat PWD bad ka MoRD kiba la shimkhia ban pynurlong ïa katei ka kam kaba na ka liang jong kum u nongmihkhmat barim ka Umroi konstitwensi, u la thoh bad kyrpad sha ka MoRD naduh u snem 2021.
U la ong ruh ba kum ka thaiñ, ki paidbah ka Raid Madan Kyrdem ki la mad jingeh baroh shi katta namar ka jingsniew ba palat pud jong u surok ha kine ki 20 snem tam kiba la dep bad lyngba kane ka jingmang tyngka jong ka Sorkar Kmie, kan pynsuk shi kat dei ïa ki paidbah bad kan kyntiew ruh ïa ka ïoh ka kot ka jong ki ynda haba la lah ba pyndep ïa kitei ki 2 tylli ki surok kiba donkam bha jong ka thaiñ Umroi.
Shuh shuh na ka liang jong u Bah Lyngdoh u kyrmen skhem ba ka jingpyntrei ïa kitei ki surok kan sdang noh shen khnang ba kan pynsuk bad kyntiew ïa ki paidbah ka thaiñ baroh kawei.
