Shillong, Ïaïong 14:
Ka jingnoh jong uwei u rangbah ïa uba la tip kyrteng kum u Bah Aiban Dewkhaid uba la don 45 snem ka rta ha ka shnong Kenbah Malai ha ka 10 tarik u bnai Ïaïong, 2023 sha ka riat ‘Dhoi’ kaba don ha Kenbah Malai jong ka Mawsynram konstitwensi, ka la pynlong ïa ki bor shnong ba kin shem jingeh ban tan ïa ka met ka jong u namar katei ka riat ka long kaba kynjang bad itriem haduh katta katta.
Na ka liang u nongai khubor u la leit sha katei ka jaka ha ka Sngi Thohdieng ha kaba u la shem ba katei ka riat kaba utei u rangbah u la noh kam da pajih than na ki ïing ki sem kiba don ha Kenbah Malai, hynrei jingkynjang jong kane ka riat ka long kaba ishyrkhei ban peit watla ym pat lah ban pyntikna ïa ka jingjrong jong katei ka riat.
Haba batai halor katei ka jingjia, na ka liang u Bah S.K Dewkhaid, uba long u Rangbah Shnong ka Kenbah Malai, bad uba dei ruh u bahaïing hasem jong u Bah Aiban, u la ïathuh ba ha ka 10 tarik u bnai Ïaïong, ha ka por 8 shiteng mynstep, u Bah Aiban u la wan mareh sha katei ka jaka ba long riat kaba u thmu ban noh ïap ha ryngkat ka jingrah ïa ka wait bad ïa u dieng ha ka kti lade bad u la shong hangta.
U Rangbah Shnong u la ong ba watla na ka liang jong uwei u rangbah uba wan thohdieng sha katei ka jaka u la ong ïa u Bah Aiban ba un nym shong ha tmier jong katei ka riat, hynrei u Bah Aiban u la byrngem ïa utei u rangbah da kaba ong ba lada utei u rangbah um leit phai noh sha la ïing la sem, un bret ïa utei u rangbah shapoh katei ka riat.
Na ka liang utei u rangbah nongthoh dieng u la leit ban ïathuh ïa katei ka jingjia sha ki bahaïing bahasem jong u Bah Aiban bad kita ki bahaïing hasem bad ki briew jong ka shnong ki la pyrshang ban ïakren bad utei u rangbah ban mih noh na katei ka jaka. Hynrei la ong ba u Bah Aiban um shym la pynsngap satia ïa ki bad u la beh bad byrngem pynban ïa kiba la pyrshang ban wan ïarap ïa u da kaba ong artad ba un bret sha riat lada ki wan ban pynthut ïa u.
“Ban tur u paidbah shajan ruh um shah bad haba u don ki tiar pynmynsaw, u paidbah um nud satia ban tur. U la ong lypa ba wat nym wan shane shajan bad lada phi wan, ngan bret beit shane sha riat. Kane ka jingkren jong u ka la pynma bad pynsmiej,” la ong u Rangbah Shnong.
U Bah S.K. Dewkhaid u la ïathuh ruh ba ym don satia ba nud ban tur sha u Bah Aiban namar ka jingkylla dur eh ka jong u bad u Bah Aiban u la pynpaw sha kitei ki paidbah ha kaba u la ong ba ki dei ban leit noh sha la ïing la sem namar ba u lah dep ban ïap lypa bad u la ong sa kawei ba u la shu ap tang ïa uta u ‘boss’.
U Rangbah Shnong u la ong ba na ka liang ki bor shnong ki la ïai ïaleh shitom katba lah ban pynjai-jai ïa utei u rangbah, hynrei ka la long kaba eh ban pynkohnguh bad u la ong ba dei ha ka por kumba 8:30 mynmiet jong ka 10 tarik Ïaïong ba u Bah Aiban u la noh najrong katei ka riat, hynrei u la sahkut ha shiteng ka riat, bad u la khlad noh.
U Bah S.K. Dewkhaid u la ong ba u Bah Aiban u dei u briew u ba don ka jinglong kaba bha bad um dei u briew uba shiteng khlieh ne u ba don ïa ka jingpang ksuid bad u la ïathuh ba shi taïew ne ar taïew hashwa katei ka jingjia, u Bah Aiban u la ïathuh ba u la ïakynduh ïa ka ‘puri ïong’.
Ïa ka met jong utei u rangbah ym pat lah ban leit sei na katei ka jaka riat namar ym don ba nud ban hiar bad na ka liang u Bah S.K. Dewkhaid u la kyntu ia ka sorkar ba kan wan ai jingïarap ban sei ia ka met jong u Bah Aiban na katei ka riat.
