Yangon, Iaïong:
Ki bor pahara jong ka Myanmar ha ka Sngi Palei ki la iathuh ba 4 ngut ki briew ki la khlad ha ka jingshah pynbthei bom ka kali ha ka thaiñ East jong ka Myanmar ha katei ka sngi. Kane ka la jia ruh ha kawei ka jaka katba ki paidbah jong katei ka jaka ki dang ialum shi jaka ban sakhi ia ka jingsdang jong ka Buddhist New Year.
La ong ba ka Myanmar ka la mad ia shibun ki kynrum- kymram naduh u snem 2021 hi ba ka tnat shipai bad ka anti-junta ki la iakynad bad pyni bor na ka por sha ka por bad kaba la ktah pat ruh ia ki paidbah nongshong shnong jong ka Myanmar ha man ba kitei ki 2 kynhun ki ju iakhun bad pyni bor markylliang.
Katei ka jingbthei ka long tang hadien khyndiat sngi ba ka jingther naphang jong ka junta na suiñ ka la shim ia ka jingim jong palat 130 ngut ki paidbah nongshong shnong jong ka phang pdeng ka Myanmar.
La ong ba katei ka tamasa Thingyan, ka ju long ka tamasa kaba suk ba kmen bad kaba ju iaid beit- iaid ryntih man la u snem. Hynrei ha kane ka por pat la don kiba thmu ban pynsangeh ia katei ka tamasa da kiwei pat ki kynhun kiba pyrshah ia katei ki jaitbynriew ha katei ka jaka.
La ong ba katei ka jingbthei ha katei ka sngi, ka la pynjulor haduh 3 tylli ki kali hajan ka Yan Taing Aung Pagoda jong ka thaiñ Mihngi ka Shan hapoh Lashio bad 4 ngut ki shynrang ki la khlad hashen ha katei ka por.
Nalor jong kitei ki 4 ngut, sa 12 ngut kiwei pat ki dei kiba la ngat bad mynsaw lang ha katei ka jingjia bad hadien ba la pynkit sha jaka sumar, la iathuh ba 2 ngut napdeng jong kitei baroh ki dei kiba la don hapdeng ka jingma kaba khraw.
Tad haduh jong ka step Sngi Thohdieng, ym pat shym la don kano kano ruh ka kynhun ka ban kam ia katei ka kam thombor ha katei ka sngi.
Kumjuh ruh hapoh ka nongbah Yangon, ki surok ki la thylli bad kynjah jar-jar namar ki paidbah nongshong shnong ruh ki la shong setkut ialade hapoh ki iing- ki sem jongki namar ka jingsheptieng hadien ka jingther naphang jong ka Junta ha ka shnong Pazi Gyi ha ki khyndiat sngi ba la leit.
