Nongstoiñ, Ïaïong 14:
Ka kynhun ïalehkai jong ka GRC Girls Nongpyndeng bad ka Mawkadiang FC ki la rah ïa ka nam lahduh ha ka lympung ïalehkai ba la tip kum ka West Khasi Hills Block Level Under-12 Chief Minister Open Football Tournament 2023 ha Nongstoiñ Block ha ka sngi Thohdieng.
Ha ka jingïakhun final jong ki kynthei ba la pynïaid da ka shlem treikam ka District Sports Officer (DSO) West Khasi Hills, ka GRC Nongpyndeng ka la pynliem noh ïa ka Nongstoiñ SS&CC da 5-0 kol ha madan NDSA Nongpyndeng.
Ka Ibatyngkai Nongsiej ka la khur ïa ka hat-trick da kaba ïoh thep kol ha ka minit kaba 4, 20 bad 30. Katba ïa kiwei pat ki kol la thep da ka Genesha Lyngdoh ha ka minit 27, bad ha ka minit 36 la ïoh ban thep da ka Daficare Lyngkhoi.
Haba phai pat sha ka jingïakhun jong ki shynrang, ka Mawkadiang SC jop da 4-3 kol ïa ka GRC ‘A’ Nongpyndeng. Ïa ki saw tylli ki kol jong ka Mawkadiang SC la ïoh ban thep marwei da u Raphel Nongsiej ha ka minit ba 1, 13, 19 & 60, katba ïa ki lai tylli ki kol jong ka GRC ‘A’ Nongpyndeng la ïoh ban thep da u Paulmicky Nongsiej ha ka minit 22, u Jerryphrangson Wahlang ha ka minit 25 bad ïa kawei pat la kum thep hi da uwei na ki rangïalehkai ka Mawkadiang ha ka minit 47.
Ïa ki khusnam sha kine ki kynhun la sam da u Mynrti Mawkhlam Nongpyndeng u Bah V. Sohlang Piaw kum u kongsan ha ka jingdon lang ruh ka DSO Kong Balarina Syiem bad kiwei kiwei kiba la sam ruh ïa ki khusnam sha baroh ar tylli ki kynhun kiba long da ki syrnod ha ryngkat ki trophy kumjuh ki takma.
