Ha kine ki sngi da ka jingkiew sted ki kor ki bor, ki la mih bun kiba sngew ïalade ba ki dei ki nongpathai khubor khlem da tip ïa ki kyndon kiba kum ki nongthoh/nongpathai khubor ba paka ki hap ban bud. Ka jingwan jong ka ‘YouTube’ ka la plie lad ïa kiba bun ban don la ki jong ki ‘channel’. Ha ka jingkwah ban kiew sted bad ban ïoh kamai kham bun, ki la mih ki nongpyllait khubor ki bym ithuh ithaw shuh haduh ba ka la pynkulmar jingmut ïa ki nongpeit. Kane ka dei kaba jia ha kylleng ka pyrthei bad ka Ri ruh kumjuh haduh ba ka Sorkar India ka la hap ban shim ïa ki sienjam kiba tyngeh ban khang syndon ïa kito ki ‘channel’ kiba shu pynmih khubor kat kaba ïoh bad kat kaba lap khlem da wad bniah shwa ïa ki jingshisha. Nalorkata, ki la don da ki spah tylli ki ‘YouTube Channel’ kiba la shah khang namar ki ïalam bakla ïa ki nongpeit da kaba pyni da ki khubor lamler bad thaw nang.
Ka dei ka hok jong ki paidbah ban tip ïa ki jingjia bapher-bapher ha baroh ki liang. Hynrei ki don da ki lynti bad ki kyndon ha ka rukom pathai ïa ki khubor bad ym ban shu pynmih kat kaba ïoh khlem da wad bniah shwa ïa ki jingshisha. Ka jingshongshit ban ïoh bun ki nongpeit bad pisa ka pynlong ïa ki katto katne ban ym pynleit jingmut shuh ha ki jingshisha. Ki la shu leh dusmon ïa ka rukom pathai khubor kaba wanrah ïa ki jingktah kiba bun. Tang namar kawei ka khubor ka bym don jingshisha, ka Ri baroh kawei ka lah ban pluh. Don ruh kiba pynmih ïa ki khubor da ka jingthmu ban wanrah ïa ka huri-hura hapdeng ki jaitbynriew bapher-bapher. Ki pyni ïa ki dur ki dar ki bym ïahap haei-haei ruh bad ka khubor tang ban ïohlad ban kynshoit ïa ki briew. Ki don napdeng ki nongpeit ki bym kot jingmut ha ka pyrkhat ka pyrdaiñ kiba kum ngop ha kita ki jait khubor bad ki sdang ban leh ïa ki kam kiba ktah ïa ka shongsuk shongsaiñ. Lada kwah ban pynmih khubor haduh katta-katta, dei ban sngewthuh shwa ïa ka kamram bad jingkitkhlieh.
Ha kane ka Ri bad ka pyrthei, ki don ki lad pathai khubor kiba la ïoh jingithuh da ka aiñ. Ki don ruh ki nongthoh khubor kiba la da pyndep ïa ki jingpule kiba don jingïadei bad ki kam pathai khubor. Kim dei kiba shu leh lamwir khlem da sngewthuh ïa ki aiñ. Hynrei namar ka jingkiew sted ki kor ki bor, ki riew paidbah ki bym pat sngewthuh ne tip ïa ki aiñ bad ka kamram jong ki nongthoh khubor kiba paka, ki sdang ban pyrthuh bud. Tangba ha kata ka jingpyrshang ban pyrthuh bud, ki poi pynban sha ka jingleh kulmar kaba wanrah ïa ka jingktah ha ki liang bapher-bapher. Kam don jingkhang ïano-ïano ban long nongthoh/nongpathai khubor tangba ki don pat da ki kyndon kiba hap ban bud bad ki rukom kiba hap ban leh khnang ba ki khubor kiba phi pynmih kin long kiba shai, bym shah liang bad khamtam eh, ki bym ïalam bakla. Ka long ka kam be-aiñ ban ïalam bakla ïa ki nongpule/nongpeit khubor bad 100 na ka 100, ki khubor ki dei ban long kiba don ïa ka jingshisha kaba mano-mano ruh kim lah ban len.
Ngi sngewdei ban kyntu ïa kito baroh kiba ju smat ban pynmih khubor hi dalade ba kin long kiba phikir haba ki pathai ïa kano-kano ka khubor. Ka lah ban dei ka khubor kaba rit tangba lada kam don ka jingshisha, kan ïalam sha ka jingsniew. Lada pyni beit ïa ki jingshisha kumba ki long, kam don jingpher eiei wat lada ki dei ki khubor kiba lah ban wanrah ïa ka jingïakhluit. Ka jingshisha ka dei ban neh beit ka jingshisha. Ban ïoh ïa ka jingshaniah jong ki nongpeit/nongpule kam dei kaba suk, hynrei ban duh pat ïa kata, kam dei kaba eh. Lada bakla tang shisien ha ka rukom ai khubor, tang katta ki paidbah kin duh jingshaniah. Ynnai ïa peit than ïa kata ka lad kamai pisa namar ka pisa kam myntoi haba shu nang tang ban ïalam bakla bad ban pynshit ïa ki briew. Kiar na kaba ïalam bakla ne kynshoit ïa ki briew kiba lui-lui bad kiba dang duna ïa ka jingsngewthuh.
Ngi dei ruh ban kynmaw ba ka Sorkar India ka don ki tnat syntiat kiba khlaiñ bad kiba peitngor ïa ka jingïaid ki ‘YouTube Channel’ ha kylleng ka Ri. Dei ban husiar bha haba kito ki bym pat dei ki nongthoh/nongpathai khubor ba paka ki pynmih ïa ki khubor bapher-bapher. Bad na ka liang ki nongpeit/nongpule ruh kin hap ban husiar kiba kumno ki ‘channel’ ki peit ïoh ki shu shah ïalam bakla ei kha-ma-kha. Ka kam thoh/pathai khubor kam dei kaba suk namar ha kane ka pyrthei, kiba bun kim kwah shuh ban ïathuh ïa ki jingshisha kumba ki dei ban long. Namarkata, ki nongthoh/nongpathai khubor ba paka ki hap ban pynlut por bad sngi ban tih bniah ïa ki jingshisha baroh hashwa ban pynmih ne pyni sha ki paidbah khnang ba kan ym don kano-kano ka jingleh bakla.
