Shillong, Ïaïong 14:
Ka District Level Chief Minister’s Inter-School Athletic Meet 2023 ba la pynïaid da ka shlem treikam jong ka District Sports Officer (DSO), North Garo Hills ka la poi sha kaba kut ha ka sngi Thohdieng ha Resubelpara.
Ha kane ka sngi la ïadon lang ka Diana G. Sangma, MCD, EAC North Garo Hills District kum ka kongsan ha ka ryngkat ka DSO Kong Linza Fenny Syiem bad kiwei kiba la shah khot sngewbha.
Ka skul kaba la khur ïa ka nam jop ha ka Under-14 jong ki shynrang bad kynthei la rah da ka Babukona Upgraded U.P. School bad ïa ka kyrdan ba-ar la ïoh da ka Montfort Higher Sec. School
Ka Govt.RMSA Sec. School ka la jop ha ka Under-16 bad ïa ka kyrdan ba-ar la ïoh da ka Daram Union Sec. School. Katba ha ka kyrdan ïalehkai jong ka Under-18 la rah da ka Resu Union Sec. School bad ïa ka kyrdan ba-ar la ïoh da ka St. Thomas Hr. Sec. School.
Ha kane ka lympung la wan ïashim bynta da 22 tylli ki skul kiba na katei ka district ha ki lai tylli ki kyrdan ïalehkai.
Lyngba kane ka lympung ïalehkai kaba lai sngi kynthih, katei ka shlem treikam kan sa jied ïa ki nongïalehkai kiba kynsai ki ban mihkhmat ïa ka district sha ka State Level ka ban sa long shen ha ka nongbah Shillong.
