Riyadh, ïaïong:
Kumba ka paw haduh mynta-mynne hi ka long ba ka lympung ialehkai Kriket jong ka ri India kaba pawnam tam ha kylleng ka pyrthei ka Indian Premier League (IPL) khamtam eh jong ka aiom ialehkai mynta u snem, ka iai sah kum kawei na ki jingialehkai ba kongsan tam eh jong ka jingiakhun T20 League ha ka pyrthei.
Shuh shuh ruh la ka long ha ka liang ka pla pisa ba katei ka lympung ka don bynta, ka jingshimbynta jong ki rang-ialehkai ba pawnam ha ka pyrthei ne ka jingdon jong ki lad pathai khubor na ka bynta ban byrta ia ki jingialehkai ha kylleng, katei ka lympung ka iaisah kum ka bym lah ban ianujor satia ynda ianujor ia ka bad kiwei pat ki jingialehkai T20 Leagues ha kylleng ka pyrthei.
Kumta ruh kiei kiei baroh ki lah ban kylla noh shen; ha kaba na ka liang jong ka ri Saudi Arabia ka pynpaw mynta ia ka jingtyrwa sha ki trai baroh jong katei ka lympung ialehkai ban plie lem ia ka lad ka lynti na ka bynta ban thaw ia ka lympung ialehkai T20 League ba riewspah tam ha ka pyrthei bad ha ri Gulf kumjuh.
Da ka jingiai pynlut bun ka song pisa ha kiwei pat ki kam ialehkai kum ha ka jingialehkai phutbol bad Formula 1, katei ka ri mynta ka kynti ka phaikhmat ruh sha katei ka jait jingialehkai na ka bynta ban iai pynriewspah shuh shuh ia ka. Hynrei kumba ka paw mynta ka long ba ka BCCI ka lah khang ia ki nongialehkai Kriket ka ri na ka ban shimbynta ha ki jingialehkai League kiba long Shabar na ka ri India. Pynban katei ka jingtyrwa kaba lah wan na ka sorkar jong katei ka ri halor kata ka jingthaw thymmai noh ia ka T20 league, ka paw mynta ba ka BCCI ka lah ban pynkylla noh ia katei ka nongrim kaba ka iengskhem mynta.
Kiwei pat ki tyllong khubor ki iathuh ba ka jingiakren hapdeng ki arliang mamla halor katei ka bynta ka lah nang iaid shakhmat bad kaba lah ruh ban shimpor haduh shi snem tam na ka bynta ban wanrah ia u soh uba thiang bad ba jop. Hynrei ha shuwa ba kiei kiei baroh kin urlong ha kaba iadei bad katei ka bynta, katei ka lympung kan donkam ruh ban ioh ia ka jingiarap pisa bad ka jingbit na ka International Cricket Council (ICC).
Hynrei ym pat shym la slem satia ba na ka liang jong u Chairman ka ICC u Greg Barclay u lah dep ban pyntip ruh ba ka ri Saudi Arabia ka pynpaw mynta ia ka jingkwah jong ka ia ka jingialehkai Kriket ha ka ri.
Katkum ka kaiphod, kiba bun na ki nongmihkhmat jong ka sorkar Saudi Arabia bad ki nongkhaii ba pawnam katei ka ri, ki lah dep ban sakhi ia ka rukom ialehkai Kriket ha ka ri India baroh kawei da kaba phaikhmat ruh ban ioh ia ki trai jong katei ka lympung bad ruh ia ki nongkitkam ka BCCI na ka bynta ka jongthmu jong ka ha kaba iadei bad ka lympung kaba lah ruh ban ienglang ha kajuh ka kyrdan bad ka IPL ha kaba iadei bad ka pla pisa ka jong ka.
Ka jinglah ban urlong ha ka ban pynlong ia ka lympung ialehkai Asia Cup shisien shi snem, ka jingialehkai ba nyngkong ne wat ha kylleng jong ka IPL ha Saudi Arabia lah pynpaw mynta ba ki don ha ka jingthmu bad ka jingpynkhreh na ka bynta ban pynurlong ia ki.
